پرەزيدەنت ىشكى ىستەر ءمينيسترى ەرجان سادەنوۆتى قابىلدادى

استانا. KAZINFORM - قاسىم-جومارت توقايەۆقا ەلىمىزدەگى كريمينوگەندىك جاعداي تۋرالى اقپارات بەرىلدى.

ەرجان سادەنوۆتىڭ ايتۋىنشا، جىل باسىنان بەرى قىلمىستىڭ تومەندەۋى بايقالادى. قىلمىستىق قۇقىقبۇزۋشىلىق - 5,5 مىڭعا، قىلمىس 10 مىڭعا ازايعان.

قوعامدىق ورىنداردا جانە كامەلەتكە تولماعانداردىڭ قاتىسۋىمەن جاسالعان قۇقىقبۇزۋشىلىقتار سانى تومەندەدى. سونىمەن قاتار قىلمىستى اشۋ كورسەتكىشتەرى جاقساردى.

مينيستر ەلىمىزدە «زاڭ مەن ءتارتىپ» قاعيداتىن ىسكە اسىرۋ، قۇقىقبۇزۋشىلىققا «مۇلدەم توزبەۋشىلىك» جانە ونىڭ الدىن الۋ شارالارى تۋرالى حابارلادى.

جىل باسىنان بەرى اكىمشىلىك قۇقىقبۇزۋشىلىقتىڭ جولىن كەسۋ 40 پايىزعا ارتتى، سونىڭ ىشىندە ۇساق بۇزاقىلىقتىڭ الدىن الۋ 30 پايىزعا، كولىك قوزعالىسى ەرەجەلەرىن بۇزۋعا جول بەرمەۋ 48 پايىزعا كوبەيدى. كولىك جۇرگىزۋ قۇقىعىنان ايىرىلعان جۇرگىزۋشىلەر 32 پايىزعا ارتتى، ولاردىڭ قاتارىندا ماس كۇيدە رولگە وتىرعانى ءۇشىن جاۋاپقا تارتىلعان ازاماتتار بار. ىزدەۋدە جۇرگەن 1,6 مىڭنان استام قىلمىسكەر ۇستالدى، ولاردىڭ 158 ءى شەتەلدە تۇتقىندالدى.

سونداي-اق مەملەكەت باسشىسى ۇيىمداسقان، كيبەر جانە ەسىرتكى قىلمىستارىنا قارسى ءىس-قيمىل، جول قاۋىپسىزدىگىن قامتاماسىز ەتۋ، قىلمىستىق اتقارۋ جۇيەسىن جەتىلدىرۋ جانە كادر ۇدەرىستەرىن سيفرلاندىرۋ جونىندەگى تاپسىرمالارىنىڭ ورىندالۋ بارىسىمەن تانىستى.

كەزدەسۋ سوڭىندا قاسىم-جومارت توقايەۆ ەلىمىزدەگى قۇقىقتىق ءتارتىپ پەن قوعامدىق قاۋىپسىزدىك دەڭگەيىن ودان ءارى ارتتىرۋ بويىنشا ءبىرقاتار تاپسىرما بەردى.