پرەزيدەنت وسكەمەندەگى ۇستەل تەننيسى ورتالىعىن ارالاپ، بالالارعا اۆتوبۋس سىيلادى
وسكەمەن. KAZINFORM - پرەزيدەنت وسكەمەندەگى ۇستەل تەننيسى ورتالىعىن ارالاپ كوردى.
پرەزيدەنتكە بەرىلگەن مالىمەتكە سايكەس، ورتالىق ۇستەل تەننيسى بويىنشا وبلىستاعى بالالار مەن جاس وسپىرىمدەرگە ارنالعان وليمپيادالىق رەزەرۆ سپورت مەكتەبىنىڭ بازاسىندا قۇرىلعان.
مۇندا ءىرى جارىستار، بۇقارالىق سپورت شارالارى مەن وقۋ-جاتتىعۋ جيىندارى وتكىزىلەدى.
سونداي-اق ينۆاكلۋب سپورتشىلارى، «ءۇمىت» بالالار ءۇيىنىڭ تاربيەلەنۋشىلەرى ءۇشىن كاسىبي دارىستەر، شوۋداۋن (كوزى ناشار كورەتىندەرگە ارنالعان ۇستەل تەننيسى) ۇيىمداستىرىلادى.
عيمارات كاسىبي تەننيس ۇستەلدەرىمەن جانە باسقا دا سپورت قۇرالدارىمەن جابدىقتالعان.
ورتالىقتا سپورتشىلاردىڭ جارىستاردان كەيىن جانە جاراقات العان كەزدە فيزيوتەراپيا ەم-شارالارىن الىپ، قايتا قالىپقا كەلۋى ءۇشىن ارنايى قۇرىلعىلارمەن جابدىقتالعان دارىگەرلىك-دەنەشىنىقتىرۋ ديسپانسەرى بار.
قاسىم-جومارت توقايەۆقا سپورتتىڭ وسى ءتۇرى بويىنشا ءوڭىردىڭ جەتىستىكتەرى تۋرالى مالىمەت بەرىلدى.
مىسالى، وتكەن جىلى وبلىس كومانداسى قازاقستاننىڭ اشىق چەمپيوناتىندا جەڭىمپاز اتانعان.
پرەزيدەنتكە تاجىريبە الماسىپ، سپورتتىق شەبەرلىگىن شىڭداۋ ءۇشىن ۇستەل تەننيسى اكادەمياسىن قۇرۋ جوسپارلانىپ وتىرعانى جونىندە باياندالدى.
مەملەكەت باسشىسى سپورت ارەنالارىن ارالاپ كورىپ، «ءۇمىت» بالالار ءۇيىنىڭ تاربيەلەنۋشىلەرىمەن سويلەستى.
پرەزيدەنت وبلىس اكىمىنە اتالعان مەكەمەنىڭ جاعدايىن ەرەكشە باقىلاۋدا ۇستاۋدى جانە تاربيەلەنۋشىلەردى تۇرعىن ۇيمەن قامتاماسىز ەتۋدى تاپسىردى.
- سىزدەرمەن جۇزدەسكەنىمە قۋانىشتىمىن. ال ورتالىققا كەلەر بولساق، ول، شىن مانىندە، جۇيەلى جۇمىس ىستەپ جاتىر. جالپى، ۇستەل تەننيسىمەن شۇعىلدانۋ ادامي قاسيەتتەر مەن سپورتتىق داعدىلاردى دامىتۋ تۇرعىسىنان پايدالى، - دەدى مەملەكەت باسشىسى.
قاسىم-جومارت توقايەۆ ۇستەل تەننيسى ورتالىعىنا اۆتوبۋس سىيلاپ، جاس سپورتشىلارعا تابىس تىلەدى.
