پرەزيدەنت ورتالىق ازيا - قىتاي اقپارات قۇرالدارىنىڭ فورۋمىنا قۇتتىقتاۋ جولدادى
استانا. KAZINFORM - ەلوردادا پرەزيدەنتتىك ورتالىقتا ورتالىق ازيا مەن قىتاي ىنتىماقتاستىعى جانە دامۋى فورۋمى، سونداي-اق ІІІ «جىبەك جولى» حالىقارالىق كوممۋنيكاتسيالىق كونفەرەنسياسى ءوتىپ جاتىر، دەپ حابارلايدى Kazinform ءتىلشىسى.
فورۋم قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ قۇتتىقتاۋىمەن اشىلدى. قۇتتىقتاۋ حاتىن پرەزيدەنت كومەكشىسى ارمان قىرىقبايەۆ وقىپ بەردى.
- سىزدەردى قىتاي حالىق رەسپۋبليكاسىنىڭ ءتوراعاسى شي جينپيىڭ مىرزانىڭ قازاقستانعا ساپارىنا جانە ەكىنشى «ورتالىق ازيا - قىتاي» سامميتىنە وراي ءوتىپ جاتقان القالى جيىنداردىڭ باستالۋىمەن قۇتتىقتايمىن! مۇنداي ءىس-شارالار قازاقستان مەن ورتالىق ازيا ەلدەرىنىڭ قىتايمەن گۋمانيتارلىق ديالوگىن ورنىقتىرىپ، مادەني ىقپالداستىعىن ارتتىرا تۇسەدى. تاتۋلىق، دوستىق جانە جان-جاقتى ستراتەگيالىق ارىپتەستىك قاعيداتتارىنا نەگىزدەلگەن قازاق-قىتاي قارىم-قاتىناستارى جىل سايىن نىعايىپ كەلەدى. بيىلعى جىل «قازاقستانداعى قىتاي تۋريزمى جىلى» دەپ جاريالاندى. سونىڭ اياسىندا ءوزارا تۇسىنىستىك پەن ىقپالداستىقتى تەرەڭدەتە تۇسۋگە ارنالعان اۋقىمدى جوبالار ۇيىمداستىرىلادى. بۇگىنگى باسقوسۋدا ەلدەرىمىزدىڭ بۇقارالىق اقپارات قۇرالدارىنىڭ بايلانىسىن ودان ءارى جاقسارتۋعا مۇمكىندىك بەرەتىن ماڭىزدى ۇسىنىستار مەن سالماقتى وي-پىكىرلەر ايتىلادى دەپ سەنەمىن. بارشاڭىزعا زور دەنساۋلىق، باق-بەرەكە تىلەيمىن! جۇمىستارىڭىز تابىستى بولسىن! ، − دەپ جازىلعان پرەزيدەنت قۇتتىقتاۋىندا.
ايتا كەتەيىك، فورۋم «قىتاي مەن ورتالىق ازيا اراسىنداعى ىنتىماقتاستىقتىڭ جاڭا كەزەڭىن قۇرۋ ءۇشىن ب ا ق- تى ينتەگراتسيالاۋ» تاقىرىبىندا ءوتىپ جاتىر.
ءىس-شارانى قىتايدىڭ «شينحۋا» اقپارات اگەنتتىگى جانە قازاقستان رەسپۋبليكاسى پرەزيدەنتىنىڭ تەلەراديوكەشەنى بىرلەسىپ ۇيىمداستىرعان. فورۋمعا 6 ەلدىڭ مەديا سالاسىندا جۇمىس ىستەيتىن شامامەن 140 وكىل قاتىسىپ جاتىر.
كەزدەسۋدە وڭىرلىك اقپارات الماسۋدى كەڭەيتۋ جولدارى، بىرلەسكەن جوبالاردى ىسكە قوسۋ جانە گۋمانيتارلىق بايلانىستاردى نىعايتۋ ماسەلەلەرى تالقىلانباق.
ايتا كەتەيىك، 17- ماۋسىم كۇنى ەلورداداعى تاۋەلسىزدىك سارايىندا «ورتالىق ازيا - قىتاي» Ⅱ سامميتى ءوتتى.
سامميتتە استانا دەكلاراتسياسىنا قول قويىلدى.
اۆتور
ايجان سەرىكجان قىزى
