پرەزيدەنت تەلەراديوكەشەنى سۋ تاسقىنى سالدارىن جويۋ تۋرالى «سەرت» دەرەكتى فيلمىن ازىرلەدى
استانا. KAZINFORM - دەرەكتى فيلمدە مەملەكەت باسشىسىنىڭ وڭىرلەردى قالپىنا كەلتىرۋ جانە سۋ تاسقىنىنان زارداپ شەككەن تۇرعىندارعا كەلگەن زالالدى وتەۋ جونىندەگى تاپسىرمالارىنىڭ ورىندالۋى باياندالادى.
2024 -جىلدىڭ كوكتەمىندە قازاقستان 80 جىلدا بولماعان ەڭ ءىرى تابيعي اپاتتى - كوكتەمگى سۋ تاسقىنىن باستان وتكەردى. اتىراۋ، اقمولا، قوستاناي، سولتۇستىك قازاقستان جانە باتىس قازاقستان وبلىستارىندا وزەندەرگە ارناسىنان تاسىپ، ۇلكەن شىعىن اكەلدى.
مەملەكەت باسشىسى قاسىم-جومارت توقايەۆ سول كەزدە زارداپ شەككەن بىرنەشە وڭىرگە بارىپ، وقيعانىڭ اۋقىمىن جەكە ءوزى باعالادى، قازاقستاندىقتارعا قولداۋ كورسەتىپ، ۇكىمەت پەن وبلىس باسشىلارىنا ءبىرقاتار ناقتى تاپسىرما بەردى.
پرەزيدەنت حالىققا سەرت بەردى جانە جاز بەن كۇزدىڭ 5 ايىندا زارداپ شەككەن اۋدانداردى قالپىنا كەلتىرۋ جۇمىستارى، زالالدى وتەۋ ءىس-شارالارى، ءۇي سالۋ مەن ينفراقۇرىلىمدى جوندەۋ جۇمىستارى جەكە باقىلاۋىندا بولاتىنىن ايتتى.
سۋ تاسقىنى كەزىندە ق ر پرەزيدەنتىنىڭ تەلەراديوكەشەنى «ستيحيا» دەرەكتى فيلمىن ءتۇسىردى. سودان بەرى 5 اي ءوتتى. پرەزيدەنتتىڭ ۇكىمەتكە بەرگەن تاپسىرمالارى قانشالىقتى ورىندالدى، سۋ تاسقىنىنان زارداپ شەككەن اۋداندار قالاي قالپىنا كەلتىرىلدى، تۇرعىن ۇيدەن، مۇلىكتەن جانە مالدان ايىرىلعان تۇرعىندار ماسەلەسى تولىعىمەن شەشىلدى مە؟ مەملەكەت باسشىسىنىڭ ەلگە بەرگەن ۋادەسى ورىندالدى ما؟ وسى سۇراقتارعا جاۋاپ رەتىندە «سەرت» دەرەكتى فيلمىندە كورەرمەنگە سۋ تاسقىنىنان زارداپ شەككەن اتىراۋ، اقتوبە، اقمولا، قوستاناي، سولتۇستىك قازاقستان جانە باتىس قازاقستان وبلىستارىنىڭ بۇگىنگى كەلبەتى ۇسىنىلعان.
اۆتور
ايجان سەرىكجان قىزى
