پرەزيدەنت تاپسىرماسى: الماتىدا سۋمەن قامتۋ نىساندارىنىڭ قۇرىلىسى قالاي ءجۇرىپ جاتىر
الماتى. KAZINFORM - الماتى قالاسىنىڭ اكىمى دارحان ساتىبالدى مەگاپوليستىڭ سۋمەن جابدىقتاۋ جۇيەسىن دامىتۋ جانە جاڭعىرتۋعا باعىتتالعان ينجەنەرلىك ينفراقۇرىلىمنىڭ ماڭىزدى نىساندارىن تەكسەردى.
اقساي وزەنىندە سۋ قويماسى، نۇرلىتاۋ شاعىن اۋدانىندا سۋ جيناقتاۋ كەشەنى، سونداي-اق نۇر الاتاۋ شاعىن اۋدانىندا رەزەرۆتىك گيدروتەحنيكالىق قۇرىلعى سالىنىپ جاتىر.
العاشقى نىسان 1948-جىلى سالىنعان، كەيىن 2015-جىلى سوڭعى رەت رەكونسترۋكسيالانعان. قازىر ول الماتى حالقىنىڭ شامامەن %20 ىن، ونىڭ ىشىندە بوستاندىق اۋدانى مەن المالى، مەدەۋ جانە اۋەزوۆ اۋداندارىنىڭ كەي بولىكتەرىن سۋمەن قامتاماسىز ەتىپ وتىر.
اكىمنىڭ ايتۋىنشا، مۇنداي ستانتسيالاردىڭ تۇراقتى جۇمىسى قالا تۇرعىندارىنىڭ دەنساۋلىعى مەن قاۋىپسىزدىگىنە تىكەلەي اسەر ەتەدى.
كەلەسى نىسان - ناۋرىزباي اۋدانىنىڭ تاۋجولى شاعىناۋدانىنداعى سۋ تارتۋ ستانتسياسىنىڭ قۇرىلىسى. قۇرىلىس-مونتاج جۇمىستارى 2025-جىلدىڭ قاراشاسىندا اياقتالادى دەپ جوسپارلانعان.
جوبا ناۋرىزباي جانە ءىشىنارا قاراساي اۋداندارىنىڭ 100 مىڭنان استام تۇرعىنىن ساپالى اۋىز سۋمەن قامتاماسىز ەتۋگە مۇمكىندىك بەرەدى.
- سۋ - ءومىردىڭ كوزى. سوندىقتان مۇنداي جوبالار ۋاقىتىندا اياقتالىپ، بارلىق ستاندارتتارعا ساي بولۋى كەرەك، - دەپ اتاپ ءوتتى دارحان ساتىبالدى.
نۇرلىتاۋ شاعىناۋدانىندا سۋ دايىنداۋ كەشەنى مەن سۋ قىسىمىن ارتتىرۋعا ارنالعان سورعى ستانتسياسىنىڭ قۇرىلىسى ءجۇرىپ جاتىر. بۇل جوبا نۇر الاتاۋ، ەرمەنساي، رەميزوۆكا، اقتوبە جانە باسقا دا شاعىناۋدانداردىڭ 45 مىڭنان استام تۇرعىنىن سۋمەن قامتۋدى جاقسارتۋعا باعىتتالعان.
اكىم جۇمىس قارقىنىن كۇشەيتىپ، نىساندى 2026-جىلدىڭ جاز ماۋسىمىنىڭ سوڭىنا دەيىن اياقتاۋدى تاپسىردى.
- سۋمەن قامتاماسىز ەتۋ - ەرەكشە باقىلاۋدا. قالا ءوسىپ كەلەدى، سوندىقتان الماتىنىڭ اۋقىمىنا ساي قوسىمشا قۋات كوزدەرى قاجەت، - دەدى اكىم.
جۇمىس ساپارىنىڭ سوڭىندا قالا باسشىسى نۇر الاتاۋ شاعىناۋدانىندا سالىنىپ جاتقان رەزەرۆتىك گيدروتەحنيكالىق نىساندا بولدى. بۇل جوبا قالانىڭ سۋمەن جابدىقتاۋ جۇيەسىنىڭ شارىقتاۋ كەزەڭدەرىندەگى تۇراقتىلىعىن ارتتىرىپ، بۇكىل ينفراقۇرىلىمنىڭ سەنىمدى جۇمىسىن قامتاماسىز ەتۋگە باعىتتالعان.
ەسكە سالايىق، بۇعان دەيىن مەملەكەت باسشىسى قاسىم-جومارت توقايەۆ الماتى قالاسىن سۋمەن قامتاماسىز ەتۋ جالپى مەملەكەتتىك ماڭىزى بار باسىم مىندەت ەكەنىن اتاپ وتكەن بولاتىن.
