پرەزيدەنت ستيپەندياسىن تاعايىنداۋ ەرەجەسى وزگەرەدى

استانا. KAZINFORM – ق ر پرەزيدەنتى ستيپەندياسىن تاعايىنداۋ ەرەجەلەرىنە عىلىم جانە جوعارى ءبىلىم ءمينيسترىنىڭ 2024 -جىلعى 20-اقپانداعى №69 بۇيرىعىمەن وزگەرىستەر ەنگىزىلدى.

اتالعان «ق ر پرەزيدەنتى بەلگىلەگەن ستيپەنديالاردى تاعايىنداۋ ەرەجەسىن بەكىتۋ تۋرالى» قازاقستان رەسپۋبليكاسى ءبىلىم جانە عىلىم ءمينيسترىنىڭ 2011 -جىلعى 7-ساۋىردەگى № 136 بۇيرىعىنا وزگەرىستەر ەنگىزىلسىن:

پرەزيدەنت ستيپەندياسى مەنشىك نىسانى مەن ۆەدومستۆولىق باعىنىستىلىعىنا قاراماستان جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ ستۋدەنتتەرى مەن ماگيسترانتتارىنا تاعايىندالادى.

ستيپەنديا:

1) ستۋدەنتتەر مەن ماگيسترانتتاردىڭ عىلىمي-زەرتتەۋ جانە وقۋ-تانىمدىق قىزمەتىن ىنتالاندىرۋعا؛

2) اناعۇرلىم تالانتتى جانە دارىندى ستۋدەنتتەر مەن ماگيسترانتتاردى قولداۋعا؛

3) ينتەللەكتۋالدى الەۋەتىن قالىپتاستىرۋعا ىقپال ەتۋگە باعىتتالعان.

«عىلىم جانە جوعارى ءبىلىم مينيسترلىگى ستيپەنديانى پرەزيدەنت قاۋلىسىنىڭ 4-تارماعىنا سايكەس مەملەكەتتىك ورگاندار مەن مەنشىك نىسانىنا جانە ۆەدومستۆولىق باعىنىستىلىعىنا قاراماستان جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنا 2023 -جىلعى 30-ناۋرىزعا دەيىن بولەدى. كۇندىزگى وقىتۋ بويىنشا ستۋدەنتتەر مەن ماگيسترانتتار سانى 700 ادام بولاتىن جوعارى وقۋ ورىندارىنا ستيپەنديا بولىنبەيدى. سونداي-اق، ستيپەنديا ستۋدەنتتەرگە 3-كۋرستان باستاپ، ال ماگيسترانتتارعا ەكىنشى وقۋ جىلىنان باستاپ مەملەكەتتىك ءبىلىم بەرۋ تاپسىرىسى بويىنشا جانە اقىلى نەگىزدە تەك «وتە جاقسى» (ا، ا- ) وقيتىن ستۋدەنتتەر مەن ماگيسترانتتارعا بەرىلەدى»، - دەلىنگەن بۇيرىقتا.

ستيپەنديا كەلەسى ساناتتاعى ستۋدەنتتەر مەن ماگيسترانتتارعا تاعايىندالادى:

1) رەسپۋبليكالىق جانە حالىقارالىق وليمپيادالاردىڭ، شىعارماشىلىق كونكۋرستاردىڭ، سپورتتىق جارىستاردىڭ، فەستيۆالداردىڭ جەڭىمپازدارى نەمەسە جاڭالىقتار، ونەرتاپقىش اۆتورلارعا؛

2) عىلىمي ەڭبەك جيناقتارىندا، رەسپۋبليكالىق جانە حالىقارالىق عىلىمي جۋرنالداردا جاريالانىمدارى بارلارعا؛

3) تابىستارى ديپلومدارمەن، گراموتالارمەن، سەرتيفيكاتتارمەن، كۋالىكتەرمەن راستالعان عىلىمي-زەرتتەۋ جۇمىستارىمەن بەلسەندى اينالىساتىندارعا؛

4) ج و و- نىڭ قوعامدىق، مادەني جانە سپورتتىق ومىرىنە بەلسەنە ارالاساتىندارعا.

«ستيپەنديا عىلىمي كەڭەستىڭ شەشىمى نەگىزىندە جوعارى وقۋ ورنى رەكتورىنىڭ بۇيرىعىمەن جۇزەگە اسىرىلادى جانە ول ءبىر اكادەميالىق كەزەڭگە تاعايىندالادى. سول سياقتى ستيپەنديا جوعارى وقۋ ورنى عىلىمي كەڭەسىنىڭ شەشىمىنە سايكەس ءبىر تۇلعاعا بىرنەشە رەت بەرىلۋى مۇمكىن. ۇمىتكەرلەر اراسىندا تەڭ جاعداي تۋىنداعاندا جەتىم جانە اتا-انانىڭ قامقورلىعىنسىز قالعان ستۋدەنتتەر مەن ماگيسترانتتارعا، بالا كەزىنەن مۇگەدەك شاكىرتتەرگە بەرىلەدى»، - دەپ تولىقتىرىلعان قۇجاتتا.

عىلىم جانە جوعارى ءبىلىم ءمينيسترى بۇيرىعىنىڭ تولىق نۇسقاسىمەن مىنا سىلتەمە ارقىلى تانىسۋعا بولادى.

اۆتور

داۋلەت ىزتىلەۋ