پرەزيدەنت ساۋد ارابياسى كورولدىگىنىڭ ەلشىسىن قابىلدادى
استانا. KAZINFORM - مەملەكەت باسشىسى ساۋد ارابياسى كورولدىگىنىڭ قازاقستان رەسپۋبليكاسىنداعى ەلشىسى فايسال ءال-كاحتانيدى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.
پرەزيدەنت قاسىم-جومارت توقايەۆ قازاقستاننىڭ ساۋد ارابياسىمەن ىنتىماقتاستىقتى جان-جاقتى نىعايتۋعا ايرىقشا ءمان بەرەتىنىن ايتتى.
قاسىم-جومارت توقايەۆ تاق مۇراگەرى، ساۋد ارابياسىنىڭ پرەمەر-ءمينيسترى مۇحاممەد بەن سالمان ءال ساۋدتىڭ ەكى ەلدىڭ سان قىرلى ىقپالداستىعىن ىلگەرىلەتۋگە قوسقان ەلەۋلى ۇلەسىن ايرىقشا اتاپ ءوتتى.
- تاق مۇراگەرى مۇحاممەد بەن سالمان - شىن مانىندە، جاھاندىق اۋقىمداعى مىقتى ءارى بەدەلدى كوشباسشى. ونىڭ ءوز وتانىن وركەندەتۋدى كوزدەيتىن كورەگەن ءارى پروگرەسسيۆتى ستراتەگياسى، سونداي-اق حالىقارالىق تۇراقتىلىق پەن قاۋىپسىزدىكتى نىعايتۋ ىسىندە اتقارعان ءرولى ەڭ جوعارى باعا مەن قۇرمەتكە لايىق، - دەدى قازاقستان پرەزيدەنتى.
قاسىم-جومارت توقايەۆ مۇحاممەد بەن سالماندى قازاقستانعا مەملەكەتتىك ساپارمەن كەلۋگە شاقىراتىنىن راستادى.
فايسال ءال-كاحتاني ءوز ەلىنىڭ قازاقستان رەسپۋبليكاسىمەن ستراتەگيالىق سەرىكتەستىكتى ودان ءارى تەرەڭدەتۋگە بەيىل ەكەنىن ايتتى.
ول جاقىندا قول قويىلعان ينۆەستيتسيالاردى كوتەرمەلەۋ جانە ءوزارا قورعاۋ تۋرالى كەلىسىم، سونداي-اق ەكى ەل اراسىندا كوورديناتسيالىق كەڭەس قۇرۋ ءتيىمدى بايلانىستاردى جانداندىرۋعا جول اشاتىنىنا نازار اۋداردى.
بۇدان بولەك، ديپلومات تاياۋ شىعىستاعى كۇردەلى احۋالعا بايلانىستى قازاقستان پرەزيدەنتىنىڭ كورسەتكەن جان-جاقتى قولداۋىنا ساۋد ارابياسى باسشىلىعىنىڭ شىنايى ريزاشىلىعىن جەتكىزدى. سونىمەن قاتار قازاقستاننىڭ بىتىمگەرلىك كەلىسسوزدەردى كيەلى تۇركىستان شاھارىندا وتكىزۋ تۋرالى باستاماسىنىڭ وزەكتى ەكەنىنە توقتالدى.
قاسىم-جومارت توقايەۆ ايماقتىڭ تۇراقتىلىعىن، قاۋىپسىزدىگى مەن ورنىقتى دامۋىن قامتاماسىز ەتۋ ارەكەتتەرىنە الداعى ۋاقىتتا دا جاردەمدەسۋگە ازىرلىگىن، سونداي-اق ساۋد ارابياسىنا جانە شىعاناقتاعى بارلىق ەلدەرگە تىلەكتەستىگىن ءبىلدىردى.
كەزدەسۋ سوڭىندا پرەزيدەنت قوس كيەنىڭ ساقشىسى، ساۋد ارابياسىنىڭ كورولى سالمان بەن ابدەلازيز ءال ساۋدقا جانە تاق مۇراگەرى، پرەمەر-مينيستر مۇحاممەد بەن سالمان ءال ساۋدقا ىستىق ىقىلاسى مەن سالەمىن جولداپ، باۋىرلاس ساۋد ارابياسى حالقىنا باق-بەرەكە تىلەدى.
بۇعان دەيىن پرەزيدەنت «رۋسسكايا مەدنايا كومپانيا» نەگىزىن قالاۋشى يگور التۋشكيندى قابىلداعانىن حابارلاعان ەدىك.
