پرەزيدەنت پرەمەر-مينيسترگە ەكونوميكانى ءارتاراپتاندىرۋدى تاپسىردى
استانا. KAZINFORM - قاسىم-جومارت توقايەۆ پرەمەر-مينيستر ولجاس بەكتەنوۆتى قابىلدادى. بۇل تۋرالى اقوردانىڭ باسپا ءسوز قىزمەتى ءمالىم ەتتى.
مەملەكەت باسشىسىنا ەلىمىزدىڭ الەۋمەتتىك-ەكونوميكالىق دامۋى جانە ۇكىمەت قىزمەتىنىڭ تيىمدىلىگىن ارتتىرۋ جونىندە باياندالدى.
- پرەزيدەنتكە ەكونوميكانى ءارتاراپتاندىرۋ مەن ناقتى سەكتورداعى اۋقىمدى باعدارلامالاردى قولداۋ ارقىلى ىنتالاندىرۋعا جانە ينفراقۇرىلىمدى جاڭعىرتۋعا قاتىستى بۇعان دەيىن بەرگەن تاپسىرمالارىنىڭ ورىندالۋ بارىسى تانىستىرىلدى. سونداي-اق پرەمەر-مينيستر جىلىتۋ ماۋسىمىن وتكەرۋ، كوكتەمگى ەگىس جۇمىستارىنا جانە سۋ تاسقىنىنا قارسى دايىندىق شارالارى تۋرالى ايتتى، - دەلىنگەن حابارلامادا.
بۇدان بولەك، قاسىم-جومارت توقايەۆقا بيزنەستى دامىتۋ جانە جەكە ينۆەستيتسيا تارتۋ ءۇشىن باسقارۋدىڭ زاماناۋي سيفرلىق تاسىلدەرىن ەنگىزۋ باعىتىنداعى ۇكىمەت جۇمىسى جونىندە اقپارات بەرىلدى.
كەزدەسۋ سوڭىندا پرەزيدەنت پرەمەر-مينيسترگە ەكونوميكانىڭ قارقىندى ءوسىمىن جانە ءارتاراپتاندىرۋدى قامتاماسىز ەتۋ جۇمىستارىن جانداندىرۋدى تاپسىردى. ينفراقۇرىلىمدى جەتىلدىرۋگە، ەنەرگەتيكا مەن كوممۋنالدىق شارۋاشىلىقتى جاڭعىرتۋعا قاتىستى مىندەتتەردى ىسكە اسىرۋ ماقساتىندا جۇيەلى شارالار قابىلداۋدىڭ ماڭىزىن اتاپ ءوتتى.
ەسكە سالا كەتەيىك، بۇعان دەيىن پرەزيدەنت قاسىم-جومارت توقايەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ وتىرىسى وتكەنىن جازعان بولاتىنبىز.
