پرەزيدەنت ەۋرازيالىق دامۋ بانكىنىڭ باسقارما ءتوراعاسى نيكولاي پودگۋزوۆتى قابىلدادى

استانا. KAZINFORM - مەملەكەت باسشىسىنا بانك جۇمىسىنىڭ ناتيجەلەرى مەن الداعى كەزەڭگە ارنالعان جوسپارى جونىندە مالىمەت بەرىلدى. نيكولاي پودگۋزوۆتىڭ ايتۋىنشا، ەۋرازيالىق دامۋ بانكىنىڭ قازاقستان ەكونوميكاسىنا سالاتىن جىل سايىنعى ينۆەستيتسياسى ەكى جىل قاتارىنان 1 ميلليارد دوللاردان اسىپ وتىر.

قاسىم-جومارت توقايەۆقا بانكتىڭ 2022-2023-جىلدارداعى ينۆەستيتسياسىنىڭ جىلدىق كولەمىنىڭ جالپى سوماسى 4,2 ميلليارد دوللاردى قۇراعانى تۋرالى باياندالدى. بۇل ستراتەگيادا بەكىتىلگەن 2022-2026 -جىلدارعا ارنالعان جوسپاردان شامامەن 1,5 ەسە كوپ. وتكەن جىلدىڭ قورىتىندىسى بويىنشا بۇل كورسەتكىش 59 پايىزدى قۇرادى.

پرەزيدەنتكە بەرىلگەن مالىمەتكە سايكەس قازاقستانداعى الەۋەتتى جوبالارعا ءبولۋ ءۇشىن بانكتىڭ 2024-جىلعا قاراستىرىپ وتىرعان قارجى كولەمى 3,5 ميلليارد دوللاردان اسادى. ينۆەستيتسيانى، ەڭ الدىمەن، كولىك ينفراقۇرىلىمى، جىلۋ ەنەرگەتيكاسى، جاڭارتىلاتىن ەنەرگيا كوزدەرى، ونەركاسىپ، اگروونەركاسىپ جانە سۋ رەسۋرستارى سياقتى ستراتەگيالىق ماڭىزدى سالالارعا سالۋ جوسپارلانىپ وتىر.

نيكولاي پودگۋزوۆتىڭ ايتۋىنشا، بيىل بانك قازاقستاننىڭ قارجى نارىعىن دامىتۋ جانە ينفراقۇرىلىمدىق جوبالاردى قارجىلاندىرۋدىڭ جاڭا قۇرالدارىن ەنگىزۋ ىسىنە اتسالىسۋعا نيەتتى.

سونىمەن قاتار ەۋرازيالىق دامۋ بانكى ءتوراعاسى مەملەكەت باسشىسىنا ورتالىق ازيانىڭ سۋ-ەنەرگەتيكا سالاسىنا جاسالعان زەرتتەۋ ناتيجەلەرىن تانىستىردى. بانك قازاقستاننىڭ سۋ رەسۋرستارىن ءتيىمدى پايدالاناتىن ەلدەردىڭ كوشباسشىسى رەتىندە قالىپتاسۋىنا ىقپال ەتۋگە نيەتتى. سونداي- اق سۋدى ۇنەمدەيتىن جانە ەنەرگەتيكالىق تۇرعىدان ءتيىمدى تەحنولوگيالار بويىنشا ايماقتىق ساراپتاما ورتالىقتارىن دامىتۋ ءۇشىن 10 ميلليون دوللارعا دەيىن گرانتتىق قارجى بولۋگە دايىن. بۇعان قوسا، سۋدى ەسەپكە الۋدىڭ سيفرلىق تەحنولوگيالارىن، سۋارمالى جەرلەرگە تولىقتاي لازەرلىك جوسپارلاۋ ءتاسىلىن ەنگىزۋگە جانە زاماناۋي يرريگاتسيالىق قۇرال-جابدىقتار وندىرەتىن وڭىرلىك وندىرىستىك- سەرۆيستىك كلاستەر قۇرۋعا باعىتتالعان جوبالارعا 400 ميلليون دوللارعا دەيىن قارجى بولمەك.

مەملەكەت باسشىسى بيىل جازدا الماتى قالاسىندا ەۋرازيالىق دامۋ بانكىنىڭ جىلدىق قورىتىندى جينالىسىن جانە ىسكەرلىك فورۋمىن ۇيىمداستىرۋ ماسەلەسىن قۇپتايتىنىن جەتكىزدى. اتالعان فورۋمنىڭ كۇن تارتىبىندە ورتالىق ازيانىڭ سۋ- ەنەرگەتيكا كەشەنىنە، كولىك جۇيەسى قۇرىلىمى مەن قارجى قۇرالدارىن دامىتۋعا قاتىستى ماسەلەلەر قامتىلادى. سونىمەن قاتار قاسىم- جومارت توقايەۆ ەلىمىزدە بانك قولداۋ بىلدىرگەن ينفراقۇرىلىمدىق جوبالاردىڭ ماڭىزدى ەكەنىن ايتتى.

اۆتور

اسحات رايقۇل