پرەزيدەنت قوستاناي وبلىسىنىڭ كاسىپكەرلەرىمەن جانە ەرىكتىلەرىمەن كەزدەستى

قوستاناي. KAZINFORM - مەملەكەت باسشىسى قوستاناي وبلىسىنا جۇمىس ساپارى بارىسىندا سۋ تاسقىنى سالدارىن ەڭسەرۋگە جاردەمدەسكەن بيزنەس وكىلدەرىمەن جانە ەرىكتىلەرمەن جۇزدەستى. بۇل تۋرالى اقوردانىڭ باسپا ءسوز قىزمەتى ءمالىم ەتتى.

كەزدەسۋگە وڭىردەگى ماشينا جاساۋ، تاۋ-كەن، تاماق جانە اۋىل شارۋاشىلىعى ونەركاسىبى سالالارىنىڭ جەتەكشىلەرى، قازاقستان حالقى اسسامبلەياسىنىڭ جەرگىلىكتى وكىلدەرى، وبلىستىق جاستار رەسۋرستىق ورتالىعىنىڭ ەرىكتىلەرى جانە ستۋدەنتتەر قاتىستى.

قاسىم-جومارت توقايەۆ شاعىن جانە ورتا بيزنەسكە قولداۋ كورسەتۋ باستى مىندەت ەكەنىن اتاپ ءوتتى.

- وسى كەزدەسۋگە ءبىراز مەتسەنات قاتىسىپ وتىر. مەن سىزدەرگە ريزاشىلىعىمدى بىلدىرەمىن. بۇل - سىزدەردىڭ جۇرەك قالاۋلارىڭىز، ازاماتتىق جاۋاپكەرشىلىكتەرىڭىزدىڭ كورىنىسى. مۇنىڭ ءبارىن ماراپات ءۇشىن ەمەس، شىنايى نيەتپەن جاسالعان يگى ءىس دەپ بىلەمىن، - دەدى پرەزيدەنت.

پرەزيدەنت ەرىكتىلەرگە زور قۇرمەتپەن قارايتىنىن جانە جان-جاقتى قولداۋ كورسەتەتىنىن اتاپ ءوتىپ، ولارعا ريزاشىلىق ءبىلدىردى.

بۇعان دەيىن حابارلاعانىمىزداي، مەملەكەت باسشىسى سولتۇستىك قازاقستان وبلىسىنا جۇمىس ساپارىمەن باردى. قاسىم-جومارت توقايەۆتىڭ جۇمىس ساپارى سەرگەيەۆكا سۋ قويماسىن، قىزىلجار اۋدانىن جانە پەتروپاۆل قالاسىنىڭ توڭىرەگىن تىكۇشاقپەن ارالاپ كورۋدەن باستالدى. سونداي-اق پرەزيدەنت پەتروپاۆل سۋ تورابىندا بولدى.

بۇگىن سونداي-اق مەملەكەت باسشىسى ساپار بارىسىندا تابيعي اپاتپەن كۇرەسىپ جۇرگەن ازاماتتارعا العىس ايتقانىن جازعان بولاتىنبىز.

سولتۇستىك قازاقستان وبلىسىنان كەيىن پرەزيدەنت بورتى قوستاناي وبلىسىنا ۇشىپ بارعانىن دا حابارلاعان ەدىك. مەملەكەت باسشىسى قوستاناي وبلىسىنداعى سۋ تاسقىنىنا بايلانىستى جاعدايمەن تانىسقان بولاتىن.

بۇگىن سونداي-اق، پرەزيدەنت قوستاناي وڭىرىنە ساپارى بارىسىندا اقبوكەندەردى اتۋعا تىيىم سالىناتىنىن مالىمدەدى.