پرەزيدەنت قۇرىلتايدا ۇسىنعان جالپى ۇلتتىق قۇندىلىقتار قانداي

استانا. KAZINFORM - مەملەكەتتىك كەڭەسشى ەرلان قارين اتىراۋدا وتكەن ۇلتتىق قۇرىلتايدىڭ باستى ەرەكشەلىكتەرىن اتادى.

ونىڭ ايتۋىنشا، ۇلتتىق قۇرىلتايدىڭ اتىراۋدا وتكەن وتىرىسىنىڭ باستى ەرەكشەلىگى - مەملەكەت باسشىسى وسىعان دەيىن ايتقان يدەولوگەمالاردى قورىتا كەلە، جالپىۇلتتىق قۇندىلىقتاردىڭ ناقتى ءتىزىمىن ۇسىنعانىندا.

بۇل - تاۋەلسىزدىك جانە وتانشىلدىق، بىرلىك جانە ىنتىماق، ادىلدىك جانە جاۋاپكەرشىلىك، زاڭ جانە ءتارتىپ، ەڭبەكقورلىق جانە كاسىبي بىلىكتىلىك، جاسامپازدىق جانە جاڭاشىلدىق.

«وسى قۇندىلىقتار تۇعىرناماسى مەملەكەتتىڭ ءبىلىم بەرۋ سالاسىنداعى، وسكەلەڭ ۇرپاق تاربيەسىندەگى جانە مادەني-اعارتۋ جۇمىسىنداعى باستى باعدارى بولادى. بۇل قۇندىلىقتار قازىرگى كەزدەگى يدەولوگەمالاردى عانا ەمەس، سونىمەن بىرگە ءبارىمىز قالىپتاستىرۋعا ءتيىس جاڭا الەۋمەتتىك ەتيكانىڭ كونتۋرىن ايشىقتايدى. مەملەكەت باسشىسى قۇرىلتايدا سويلەگەن سوزىندە «ءبىزدىڭ الدىمىزدا ءۇش ايرىق جول تۇر: قۇلدىراۋ، توقىراۋ نەمەسە ورلەۋ. ءبىز ءاردايىم ورلەۋدى تاڭدايمىز» دەدى. ورلەۋگە ۇمتىلۋ - ەلدىڭ دامۋىنا كەدەرگى كەلتىرەتىن بارلىق نارسەدەن باس تارتۋدى عانا ەمەس، بارشا ازاماتتاردىڭ ءوزىن-ءوزى دامىتۋعا دەگەن بەلسەندى ۇمتىلىسىن دا بىلدىرەدى»، - دەپ جازدى ەرلان قارين Telegram پاراقشاسىندا.

سوندىقتان بۇل قۇندىلىقتار، قوعامدا بۇكىل ەلىمىزدىڭ جانە ءاربىر ازاماتتىڭ مۇددەسىن توعىستىراتىن پروگرەسسيۆتى مىنەز-قۇلىق ۇلگىلەرىن قالىپتاستىرۋدى كوزدەيدى.