پرەزيدەنت قازاقستاندىق ايەلدەر قاۋىمىن حالىقارالىق ايەلدەر كۇنىمەن قۇتتىقتادى
استانا. KAZINFORM - مەملەكەت باسشىسى قاسىم-جومارت توقايەۆ قازاقستاندىق ايەلدەر قاۋىمىن حالىقارالىق ايەلدەر كۇنىمەن قۇتتىقتادى. بۇل تۋرالى اقوردانىڭ باسپا ءسوز قىزمەتى جازدى.
قىمباتتى حانىمدار!
سىزدەردى حالىقارالىق ايەلدەر كۇنىمەن شىن جۇرەكتەن قۇتتىقتايمىن! سۇلۋلىق پەن ۇيلەسىمدى ايشىقتايتىن شۋاقتى كوكتەم مەرەكەسىندە ءبىز بارشا اسىل جاندارعا ەرەكشە قۇرمەت كورسەتىپ، ىقىلاس-ءىلتيپات بىلدىرەمىز.
سىزدەر ءتۇرلى سالادا جەمىستى ەڭبەك ەتىپ، ەلىمىزدى وركەندەتۋگە بەلسەندى اتسالىسىپ كەلەسىزدەر. كەز كەلگەن شارۋاعا جاۋاپكەرشىلىكپەن قاراپ، ءاربىر ءىستىڭ بەرەكەسىن ارتتىرۋعا ۇيىتقى بولىپ جۇرسىزدەر. ارداقتى انالار بۇكىل سانالى عۇمىرىن بالاسىنىڭ بولاشاعىنا ارناپ، وسكەلەڭ ۇرپاققا ءتالىم-تاربيە بەرىپ وتىر. وسى مارتەبەلى ميسسياسىن كاسىبي قىزمەتىمەن جانە قوعامعا پايدالى جۇمىستارمەن بىرگە اتقارىپ جۇرگەن ارۋلار دا از ەمەس. ايەلدەرگە جان-جاقتى جاعداي جاساۋ، ولاردىڭ قۇقىعىن قورعاۋ جانە وتباسى ينستيتۋتىن نىعايتۋ - مەملەكەتتىك ساياساتتىڭ نەگىزگى باسىمدىعى.
ەلىمىزدىڭ قىز-كەلىنشەكتەرى جاسامپازدىق قاسيەتىمەن قوعامنىڭ قۇندىلىقتار جۇيەسىن جاڭارتۋعا جانە ادىلەتتى قازاقستاندى قۇرۋعا ولشەۋسىز ۇلەس قوسا بەرەدى دەپ سەنەمىن. كوكتەم مەرەكەسى كوڭىلدەرىڭىزگە شاتتىق سىيلاسىن! بارشاڭىزعا باق-بەرەكە جانە تولاعاي تابىس تىلەيمىن!
اۆتور
ابىلايحان جۇماشيەۆ
