پرەزيدەنت قاراتال اۋدانىنىڭ قورعانىس ىستەرى بولىمىنە باردى
تالدىقورعان. KAZINFORM - مەملەكەت باسشىسى ۇشتوبە قالاسىندا ورنالاسقان قاراتال اۋدانى قورعانىس ىستەرى جونىندەگى ءبولىمىنىڭ عيماراتىن ارالاپ كوردى. 1983-جىلدان بەرى قولدانىستاعى نىسان بيىل كۇردەلى جوندەۋدەن ءوتىپ، قازان ايىندا اتالعان مەكەمەگە بەرىلگەن.
قورعانىس ءمينيسترى رۋسلان جاقسىلىقوۆ قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسىنا Smart-اسكەري كوميسساريات جوباسى تۋرالى باياندادى. جاڭا باستاماعا سايكەس ازاماتتار اۆتوماتتى تۇردە اسكەري ەسەپكە الىنادى.
ءمينيستردىڭ ايتۋىنشا، جىل سايىن 17 جاستاعى 160 مىڭنان اسا جاس ءوسپىرىم اۆتوماتتى تۇردە اسكەري ەسەپكە تۇرعىزىلادى. سونداي-اق مينيسترلىك جۇمىلدىرۋ رەسۋرستارىنىڭ اقپاراتتىق جۇيەسىن قۇرعان. سيفرلىق ترانسفورماتسيا قازاقستانداعى 16 مەن 60 جاس ارالىعىنداعى بارلىق ەر ازاماتتى قامتيدى. بۇل جۇمىس قاعاز نۇسقادا جۇرگىزىلگەن كەزدە ەسەپتە 2,5 ميلليون ازامات بولعان. ال سيفرلىق فورماتقا كوشكەننەن كەيىن ولاردىڭ سانى 6,8 ميلليونعا جەتكەن.
بۇدان بولەك، IT سالاسى بويىنشا ءبىلىمى بار ساربازدار «حالىق ۇنىنە قۇلاق اساتىن مەملەكەت» قاعيداتىنا سايكەس Armiakz اقپاراتتىق قىزمەتىن جاساپ شىققان. اتالعان جوبا تاربيە جانە يدەولوگيالىق جۇمىستاردى ۇيىمداستىرۋ ماقساتىندا جاساندى ينتەللەكت ارقىلى ازىرلەنگەن. اتا-انالارمەن كەرى بايلانىسقا ىڭعايلى بۇل قىزمەتتىڭ موبيلدى نۇسقاسى دا بار.
ءوز كەزەگىندە قاسىم-جومارت توقايەۆ اسكەرگە شاقىرىلعان ازاماتتارمەن اڭگىمەلەسىپ، ولارعا وتان الدىنداعى بورىشىن وتەۋدە ساتتىلىك تىلەدى.
- ەلگە قىزمەت ەتۋ - ازاماتتىق بورىش. بۇل - وتە ماڭىزدى جۇمىس، قاسيەتتى پارىز. ۇلكەن اسكەري مانساپتارعا جەتىپ، گەنەرال اتانىڭىزدار. ازاماتتىق مىندەتتى ابىرويمەن اتقارىڭىزدار. انتقا ادال بولىڭىزدار! - دەدى مەملەكەت باسشىسى.
