پرەزيدەنت ق ق س- ءتى رەفورمالاۋدى تاپسىردى: جاڭا ۇلتتىق ەكونوميكا ءمينيسترى ونى قالاي شەشپەك

استانا. KAZINFORM - ەلىمىزدە سالىق سالۋ جۇيەسى قايتا قارالادى. بۇل تۋرالى پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ ايتتى.

«بۇگىن مەملەكەت باسشىسى جاڭا سالىق كودەكسىنىڭ جالپى ادىستەرىن، ونىڭ ىشىندە قوسىلعان قۇن سالىعىن قايتا قاراۋدى تاپسىرعان بولاتىن. وسى جۇمىستىڭ اياسىندا ءبىز بيزنەس-قوعامداستىقپەن، ساراپشىلارمەن بىرگە قايتا قاراپ، اتالعان كودەكستى جازامىز. ادىستەرى قايتادان قاراستىرىلادى دەسەك تە بولادى»، - دەدى مينيستر ۇكىمەتتىڭ كەڭەيتىلگەن وتىرىسىنان كەيىنگى بريفينگتە.

ونىڭ اتاپ وتۋىنشە، جاعدايدى زەردەلەۋ بويىنشا كەشەندى جۇمىس جۇرگىزىلگەننەن كەيىن اتالعان سالاداعى وزگەرىستەرگە قاتىستى جالپى جاعداي انىقتالاتىن بولادى.

«بۇل تەك قوسىلعان قۇن سالىعىنا عانا ەمەس، جالپى سالىق سالۋ جۇيەسىنە قاتىستى. بۇل ماسەلەگە قاتىستى بيزنەس-قوعامداستىقتىڭ پىكىرىن بىلەمىز ءارى ەسكەرەتىن بولامىز. ءدال قازىر بۇل تەتىكتىڭ قانداي بولاتىندىعىن ايتا المايمىن. دەگەنمەن، ۋاقىتى كەلگەندە ءبارىن ايتىپ بەرەمىز»، - دەدى نۇرلان بايبازاروۆ.

بۇگىن پرەزيدەنت ساراپشىلار قوسىلعان قۇن سالىعىن كوتەرۋ كولەڭكەلى ەكونوميكانىڭ ۇلەسىن ارتتىرىپ، ينفلياتسيانىڭ وسۋىنە اكەپ سوقتىرۋى ىقتيمال دەپ ورىندى پىكىر ءبىلدىرىپ جاتقانىن ايتقان ەدى.

«بۇل قادام ەلىمىزدىڭ ينۆەستيتسيالىق تارتىمدىلىعىنا دا كەرى اسەر ەتۋى مۇمكىن. بۇرىنعى ۇكىمەت ۇلتتىق قوردان بولىنەتىن ترانسفەرتتىڭ ورنىنا سالىقتى كوتەرىپ، قازىناعا قوسىمشا قارجى تۇسىرەمىز دەگەن ءۋاجدى العا تارتاتىن. جاڭا سالىق كودەكسىن ازىرلەۋ بارىسىنا مەملەكەت باسشىسى رەتىندە مەنىڭ كوڭىلىم تولمايدى»، - دەدى مەملەكەت باسشىسى.