پرەزيدەنت ۇ ق ش ۇ قىزمەتى تۋرالى: ءبىز زاماناۋي قاۋىپ-قاتەر مەن سىن-تەگەۋرىندەردى مىندەتتى تۇردە ەسكەرۋگە ءتيىسپىز

سەسسيا بارىسىندا ۇ ق ش ۇ-عا مۇشە مەملەكەتتەردىڭ ۇجىمدىق قاۋىپسىزدىگىن قامتاماسىز ەتۋدىڭ وزەكتى اسپەكتىلەرى تالقىلاندى. سونىمەن قاتار ۇيىم قىزمەتىنىڭ باستى باعىتتارى بويىنشا بيىل اتقارىلعان جۇمىستاردىڭ قورىتىندىسى جاسالىپ، الداعى كەزەڭنىڭ جوسپارى ايقىندالدى. بۇدان بولەك، مەملەكەتتەر باسشىلارى جاھاندىق كۇن تارتىبىندەگى ماسەلەلەر جونىندە پىكىر الماستى.

بۇل تۋرالى Kazinform اقوردانىڭ باسپا ءسوز قىزمەتىنە سىلتەمە جاساپ حابارلايدى.

قاسىم- جومارت توقايەۆ ءوز سوزىندە بۇگىنگى سەسسيا حالىقارالىق احۋال كۇرت ناشارلاعان وتە قيىن جاعدايدا ءوتىپ جاتقانىنا نازار اۋداردى. ەۋرازيا قۇرلىعىنداعى جانە ۇ ق ش ۇ جاۋاپكەرشىلىگىنە كىرەتىن ايماق توڭىرەگىندە كۇردەلى جاعداي قالىپتاسىپ وتىر. مەملەكەت باسشىسىنىڭ پىكىرىنشە، تاياۋ شىعىستاعى وقيعالاردىڭ اۋجايى دا ەرەكشە الاڭداۋشىلىق تۋعىزادى.

- قاقتىعىستان بەيبىت حالىق زارداپ شەگىپ وتىر. قانشاما جازىقسىز ادام، بالالار قازا تاپتى. مۇندايعا بەي- جاي قاراۋ مۇمكىن ەمەس. قازاقستان گازا تۇرعىندارىنا ءبىر ميلليون دوللار كولەمىندە گۋمانيتارلىق كومەك كورسەتتى. قارجى بۇۇ قۇرىلىمى - unrwa/باپور ۇيىمى ارقىلى جىبەرىلدى. قاقتىعىس كەزىندە بۇل ۇيىمنىڭ قىزمەتكەرلەرى وتە كوپ شىعىنعا ۇشىراعانىنا قاراماستان، جۇمىسىن ەرلىكپەن جالعاستىرىپ جاتىر. تاياۋ شىعىستاعى قاقتىعىس، شىن مانىندە، جاھاندىق اۋقىمداعى اقپاراتتىق- يدەولوگيالىق تەكەتىرەستى ابدەن شيرىقتىرىپ جىبەردى. گازا سەكتورى توڭىرەگىندە بولىپ جاتقان وقيعالار الەمدىك قوعامداستىقتى ەكىگە جاردى. سوعىس ءورتى بارلىق ەل مەن كونتينەنتتى شارپىماي تۇرعاندا توقتاعانى ءجون، - دەدى پرەزيدەنت.

مەملەكەت باسشىسى قازاقستاننىڭ ۋاقىتشا ءبىتىم جاساۋ تۋرالى سوڭعى كەلىسىمدى قۇپتايتىنىن مالىمدەدى.

- ءبىز اۋەل باستان قاقتىعىسۋشى تاراپتاردىڭ گۋمانيتارلىق ءۇزىلىس جاريالاۋى كەرەك ەكەنىن ايتتىق. ولار وسى ۋاقىتتى قالىپتاسقان جاعدايدى رەتتەۋدىڭ ۇزاقمەرزىمدى شارالارىن ازىرلەۋگە پايدالانۋ ءۇشىن بار كۇش-جىگەرىن جۇمساۋى قاجەت. بۇعان قوسا، بۇۇ اياسىندا پالەستينالىقتارعا «ەكى حالىق ءۇشىن ەكى مەملەكەت» فورمۋلاسىنا ساي تولىققاندى مەملەكەت قۇرۋ قۇقىعىن بەرگەن ءجون. وسىنداي قيىن جاعدايدا بۇۇ قاۋىپسىزدىك كەڭەسىنىڭ قارارىن مۇلتىكسىز ورىنداپ، حالىقارالىق قۇقىق نورمالارىن ساقتاۋ ماڭىزدى، - دەدى قاسىم-جومارت توقايەۆ.

سونىمەن قاتار قازاقستان پرەزيدەنتى اۋعانستانداعى كۇردەلى احۋالعا نازار اۋدارىپ، حالىقارالىق قوعامداستىقتى اۋعان حالقىنا كومەك بەرۋ ءىسىن جالعاستىرۋعا شاقىردى.

- اۋعان حالقىنا گۋمانيتارلىق كومەك كورسەتۋدى جالعاستىرۋ جانە تاۋقىمەتى كوپ وسى ەلدىڭ وڭىرلىك ەكونوميكاعا ينتەگراتسيالانۋىنا ىقپال ەتۋ ماڭىزدى دەپ سانايمىز. بيىل قازاقستان اۋعانستانعا ازىق- تۇلىك، اسا قاجەتتى تاۋارلار مەن ءدارى-دارمەك جونەلتتى. قازان ايىندا اۋعانستاننىڭ باتىسىندا بولعان جەر سىلكىنىسىنە بايلانىستى كومەك كورسەتىلدى. گەرات قالاسىنا قۇتقارۋشىلار، كينولوگتار مەن مەديتسينا قىزمەتكەرلەرى جىبەرىلدى، - دەدى مەملەكەت باسشىسى.

قاسىم- جومارت توقايەۆ ۇ ق ش ۇ اياسىنداعى سەرىكتەستەردىڭ ادەتتەگى قاۋىپ- قاتەر دەڭگەيىنىڭ ۇلعايۋىنا، سونىڭ ىشىندە ەسىرتكى، قارۋ-جاراق اينالىمىنىڭ، ترانسشەكارالىق قىلمىس پەن زاڭسىز ميگراتسيانىڭ وسۋىنە قاتىستى الاڭداۋشىلىعىنا تۇسىنىستىكپەن قارايتىنىن مالىمدەدى. قازاقستان ۇيىمعا مۇشە مەملەكەتتەرمەن بىرگە وسى سىن-قاتەرلەرگە الداعى ۋاقىتتا دا توتەپ بەرۋگە ءازىر.

- ءبىز ۇ ق ش ۇ قىزمەتىنىڭ ءادىس-ءتاسىلى مەن ستراتەگياسىن جولعا قويا وتىرىپ، زاماناۋي قاۋىپ- قاتەر مەن سىن-تەگەۋرىندەردى مىندەتتى تۇردە ەسكەرۋگە ءتيىسپىز. سونىمەن قاتار ۇ ق ش ۇ-عا مۇشە مەملەكەتتەردىڭ قاۋىپسىزدىگىنە قاتەر ءتونىپ كەلە جاتقانىن، ەگەر ونداي قاۋىپ بولسا دا، ونى ۇنەمى ايتا بەرۋدىڭ قاجەتى جوق دەپ ويلايمىن. تۇپتەپ كەلگەندە، قاۋىپ- قاتەر ءاردايىم بولعان. حالىقارالىق قوعامداستىقتىڭ بولمىسى وسىنداي. بۇل تاقىرىپتى قايتا- قايتا كوتەرۋ، ءبىزدى الدەكىمنەن قورقاتىنداي كورىنىس قالىپتاستىرادى. مۇنداي مالىمدەمەلەر مۇلدە قاتە تۇسىنىككە الىپ كەلۋى مۇمكىن، ءتىپتى قازىردىڭ وزىندە سولاي بولىپ كورىنەدى. قاتىسۋشى مەملەكەتتەردىڭ ابىروي- بەدەلىن جانە ولاردىڭ اسكەري- ساياسي الەۋەتى مەن قۋاتىن ەسكەرە وتىرىپ، ۇيىمنىڭ ريتوريكاسى قاتال، ايتسە دە بەلگىلى ءبىر دەڭگەيدە قيسىندى بولۋعا ءتيىس. ۇ ق ش ۇ بەدەلدى اسكەري- ساياسي ۇيىم رەتىندە ءوزىنىڭ جەتىستىكتەرىن پاش ەتتى. ءبىراق الدىمىزدا ۇيىمعا مۇشە مەملەكەتتەردىڭ كونسترۋكتيۆتى مۇددەسىنە ساي كەلۋگە ءتيىس جاڭا مىندەتتەر تۇر، - دەدى قازاقستان پرەزيدەنتى.

سونىمەن قاتار قاسىم-جومارت توقايەۆ ۇيىمنىڭ الەۋەتىن دامىتۋ جانە سىن-قاتەر مەن قاۋىپكە قارسى ءىس-قيمىل تەتىكتەرىنىڭ تيىمدىلىگىن ارتتىرۋ ءۇشىن ءبىر جىل ىشىندە اۋقىمدى جۇمىس اتقارىلعانىن اتاپ ءوتتى. پرەزيدەنت 2024 -جىلدىڭ 1-قاڭتارىنان باستاپ قازاقستان ۇيىمعا ءتوراعالىق ەتەتىنىن جانە وسى كەزەڭدە باسىمدىق بەرىلەتىن باعىتتاردى كەڭەيتىلگەن قۇرامداعى جيىن بارىسىندا جەتكىزەتىنىن ايتتى.

قاسىم-جومارت توقايەۆ ەلىمىزدىڭ ۇيىمدى قارقىندى ءارى تەڭگەرىمدى دامىتۋعا، بارلىق مۇشە مەملەكەتتىڭ ۇلتتىق مۇددەلەرىن ەسكەرە وتىرىپ، ۇجىمدىق قاۋىپسىزدىكتى نىعايتۋعا نيەتتى ەكەنىن مالىمدەدى.

جيىنعا بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو، قىرعىز رەسپۋبليكاسىنىڭ پرەزيدەنتى سادىر جاپاروۆ، رەسەي فەدەراتسياسىنىڭ پرەزيدەنتى ۆلاديمير پۋتين، تاجىكستان رەسپۋبليكاسىنىڭ پرەزيدەنتى ەمومالي راحمون، سونداي-اق ۇ ق ش ۇ باس حاتشىسى يمانعالي تاسماعامبەتوۆ قاتىستى.

اۆتور

ايدار وسپاناليەۆ