پرەزيدەنت ناۋرىز مەرەكەسىنە وراي ءبىرقاتار ەلدىڭ باسشىلارىنا قۇتتىقتاۋ جەدەلحاتتارىن جولدادى
استانا. KAZINFORM - قاسىم-جومارت توقايەۆ ناۋرىز مەرەكەسىنە وراي ءبىرقاتار ەلدىڭ باسشىلارىنا قۇتتىقتاۋ جەدەلحاتتارىن جولدادى. بۇل تۋرالى اقوردانىڭ باسپا ءسوز قىزمەتى حابارلادى.
مەملەكەت باسشىسى وزبەكستان پرەزيدەنتى شاۆكات ميرزيەيەۆتى، قىرعىزستان پرەزيدەنتى سادىر جاپاروۆتى، تاجىكستان پرەزيدەنتى ەمومالي راحموندى، تۇرىكمەنستان پرەزيدەنتى سەردار بەردىمۇحامەدوۆتى، تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆتى، ازەربايجان پرەزيدەنتى يلحام اليەۆتى، تۇركيا پرەزيدەنتى رەجەپ تايپ ەردوعاندى، يران پرەزيدەنتى ماسۋد پەزەشكياندى، يراك پرەزيدەنتى ابدۋل لاتيف ءراشيدتى، پاكىستان پرەمەر-ءمينيسترى شاحباز ءشاريفتى ۇلىستىڭ ۇلى كۇنىمەن قۇتتىقتادى.
قازاقستان پرەزيدەنتى جەدەلحاتتارىندا ناۋرىز مەرەكەسى ەلدەرىمىزدىڭ عاسىرلار بويى قالىپتاسقان دوستىق، باۋىرلاستىق جانە ءوزارا قۇرمەت داستۇرلەرىمەن ۇيلەسەتىنىن ءارى تابيعات جاڭارۋىنىڭ نىشانى سانالاتىنىن جازعان. سونىمەن قاتار ءاز- ناۋرىزدىڭ قاستەرلى قۇندىلىقتارى حالىقتارىمىزدىڭ يگىلىگىنە باعىتتالعان بايلانىستاردى ودان ءارى دامىتۋعا سەپتىگىن تيگىزەتىنىنە سەنىم بىلدىرگەن.
ايتا كەتەلىك مەملەكەت باسشىسىنىڭ اتىنا ناۋرىز مەيرامىنا وراي قۇتتىقتاۋ جەدەلحاتتارى كەلىپ جاتىر.
