پرەزيدەنت مينيسترلەر مەن اكىمدەرگە: قاعازباستىلىق، كوزبوياۋشىلىق دەگەندى دوعارۋ قاجەت

استانا. KAZINFORM - پرەزيدەنت قاسىم-جومارت توقايەۆ قايتا جاساقتالعان ۇكىمەتتىڭ كەڭەيتىلگەن وتىرىسىندا وتكەن جىلدىڭ تابىستى بولعانىن اتاپ ءوتتى.

«جالپى، وتكەن جىل ەلىمىز ءۇشىن تابىستى بولدى دەپ ايتۋعا بولادى. ارينە، شەشىمىن تاپپاعان وزەكتى ماسەلەلەر ءالى دە بار. سوندىقتان، ەلىمىزدىڭ ساپالى دامۋى ءۇشىن ءتيىستى شەشىمدەردى قابىلداۋىمىز قاجەت. ءبىز الداعى ۋاقىتتا جاڭا ەكونوميكالىق باعدارمەن جۇرەمىز دەسەك، ۇكىمەت پەن اكىمدەر جۇمىس ىستەۋ ءتاسىلىن تۇبەگەيلى وزگەرتۋگە ءتيىس. ۇلتتىق ەكونوميكانى وركەندەتۋ ءۇشىن جاڭا يدەيالار جانە ۇزاق مەرزىمگە ارنالعان جۇيەلى ۇستانىم قاجەت. ءبىز ەلىمىزدىڭ دامۋ قارقىنىن كۇشەيتۋىمىز كەرەك. ەكونوميكانى ءارتاراپتاندىرىپ، شەتەلدەن كوبىرەك ينۆەستيتسيا تارتۋ قاجەت. ۇكىمەتتىڭ باستى مىندەتتەرىنىڭ ءبىرى - ەكونوميكالىق قىزمەت سۋبەكتىلەرىنىڭ بارىنە بىردەي جاعداي جاساۋ. ەكونوميكاعا جاڭا سەرپىن بەرۋ ءۇشىن ۇكىمەت كاسىپكەرلەرمەن، ينۆەستورلارمەن تولىققاندى سەرىكتەس رەتىندە تىعىز بايلانىستا جۇمىس ىستەۋى قاجەت»، - دەدى مەملەكەت باسشىسى.

قاسىم-جومارت توقايەۆ مەملەكەتتىك اپپارات بارىنشا ءتيىمدى جانە ۇيلەسىمدى جۇمىس ىستەۋى كەرەكتىگىن دە ايتتى.

«قاعازباستىلىق، كوزبوياۋشىلىق دەگەندى دوعارۋ قاجەت. وسىنداي جاعىمسىز ۇدەرىستەردىڭ كەسىرىنەن جۇرتتىڭ رەفورماعا جانە ادىلەتتى قازاقستانعا دەگەن سەنىمى ازايادى. جوعارىدان تاپسىرما بەرىلگەنىن، ازاماتتاردان ارىز تۇسكەنىن نەمەسە جاعدايدىڭ ناشارلاپ كەتكەنىن كۇتىپ وتىرماۋ كەرەك. باستاما كوتەرىپ، دەربەس جۇمىس ىستەي ءبىلۋ قاجەت»، - دەدى پرەزيدەنت.

اۆتور

ەسىمجان ناقتىباي