پرەزيدەنت مۇناي تاسىمالداۋدىڭ بالاما باعىتتارىنا قاتىستى ساۋالعا جاۋاپ بەردى
استانا. KAZINFORM - پرەزيدەنت قاسىم-جومارت توقايەۆ Al Jazeera تەلەارناسىنا بەرگەن ەكسكليۋزيۆ سۇحباتىندا مۇناي تاسىمالداۋدىڭ بالاما باعىتتارىنا قاتىستى ساۋالعا جاۋاپ بەردى.
Al Jazeera: وتكەن جىلى SP Global اگەنتتىگى قازاقستان مۇنايىنىڭ شامامەن 80 پايىزى ك ق ك جەلىسى ارقىلى رەسەيگە كەتىپ جاتقانىن ايتقان ەدى. مۇنى وزگەرتۋ قاجەت دەپ سانامايسىز با؟ قازاقستان ءۇشىن بۇل ستراتەگيالىق السىزدىك بولىپ ەسەپتەلمەي مە؟
- رەسەي قازاقستاننىڭ ستراتەگيالىق سەرىكتەسى، تىكەلەي كورشىمىز ءارى وداقتاسىمىز ەكەنىن ەش ەستەن شىعارماۋىمىز قاجەت. رەسەيمەن ارانى الەمدەگى ەڭ ۇزىن شەكارا ءبولىپ جاتىر. ءبىز رەسەيگە ستراتەگيالىق سەرىكتەسىمىز رەتىندە ارقا سۇيەيمىز، اسىرەسە ك ق ك جەلىسىنە سەنىم ارتامىز. تاياۋدا عانا پرەزيدەنت پۋتينمەن تەلەفون ارقىلى سويلەستىم جانە ءبىز ك ق ك جەلىسىنە قاتىستى ماسەلەلەردى تالقىلاعانىمىزدى جاسىرمايمىن. قازاقستان مۇنايىن رەسەي ارقىلى ەۋروپا نارىعىنا جانە ودان باسقا جەرلەرگە تاسىمالداۋ ءۇشىن ك ق ك ءتيىمدى قۇرال رەتىندە تۇراقتى تۇردە قىزمەت ەتە بەرەدى دەپ سانايمىن.
Al Jazeera: سوندا ءسىزدى ۋكرايناداعى سوعىستىڭ ىقپالى جانە قازاقستان مۇنايىن اتالعان قۇبىر ارقىلى ەۋروپاعا جەتكىزۋ مۇمكىندىگى قانشالىقتى ماڭىزدى ەكەنى الاڭداتپاي ما؟
- ارينە، ءبىز ۋكرايناداعى احۋالدى، رەسەي مەن ۋكراينا اراسىنداعى اسكەري قاقتىعىس ءبىزدىڭ تابيعي رەسۋرستار مەن ولاردى حالىقارالىق نارىققا ەكسپورتتاۋعا قاتىستى ستراتەگيالىق جوسپارلارىمىزعا ىقپال ەتەتىنىن ەسەپكە الامىز. دەگەنمەن رەسەي ەلىمىزدىڭ ستراتەگيالىق سەرىكتەسى ەكەنىنە دە نىق سەنىمدىمىز. ءبىراق بۇل ءبىزدى تەك ءبىر عانا كولىك باعدارىمەن نەمەسە باعىتپەن شەكتەلەدى دەگەندى بىلدىرمەيدى. سوندىقتان ءسىز باكۋ-جەيحان، ورتا ءدالىز قۇبىر جەلىسى سىندى وزگە باعىتتارى جايىندا وتە دۇرىس ايتىپ وتىرسىز. ال شەتەلگە تاسىمالداناتىن نەمەسە ەكسپورتتالاتىن مۇناي كولەمى تۇرعىسىنان العاندا، قالاي دەسەك تە، باسىمدىق ك ق ك- عا بەرىلەدى جانە ول سولاي بولۋعا ءتيىس.
ەسكە سالا كەتەيىك، مەملەكەت باسشىسى قاسىم-جومارت توقايەۆ بۇگىن قاتارلىق Al Jazeera تەلەارناسىنا ەكسكليۋزيۆ سۇحبات بەردى.
