پرەزيدەنت مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايدى قابىلدادى
استانا. KAZINFORM - پرەزيدەنت مەملەكەتتىك قىزمەت ىستەرى اگەنتتىگىنىڭ ءتوراعاسىن قابىلدادى.
دارحان جازىقباي اگەنتتىكتىڭ بىلتىرعى اتقارعان جۇمىسىنىڭ ەسەبى مەن الداعى كەزەڭگە ارنالعان جوسپارىن تانىستىردى.
ول مانساپتىق جانە پوزيتسيالىق مودەل ەلەمەنتتەرىنەن تۇراتىن مەملەكەتتىك قىزمەتتىڭ گيبريدتى مودەلىن قالىپتاستىرۋ جۇمىستارى تۋرالى باياندادى.
سونىمەن قاتار اشىق مەملەكەتتىك اپپارات قۇرۋ، اتاپ ايتقاندا، جەكە سەكتوردان بىلىكتى مامانداردى تارتۋ جانە جوعارى وقۋ ورىندارىن ۇزدىك بىتىرگەن تۇلەكتەردى تومەنگى لاۋازىمدارعا كونكۋرس وتكىزبەي- اق تاعايىنداۋ شارالارى جونىندە مالىمەت بەرىپ، e-Qyzmet جۇيەسى بويىنشا مەملەكەتتىك قىزمەتكە ىرىكتەيتىن پيلوتتىق جوبانىڭ قورىتىندىسىن تانىستىردى.
سونىڭ ناتيجەسىندە بوس لاۋازىمعا ورنالاسۋ ءۇشىن كونكۋرسقا قاتىسۋشىلار سانى 2,7 ەسە ارتقان.
بيىل e-Qyzmet ىرىكتەۋ جۇيەسىن بارلىق مەملەكەتتىك ورگانعا كەزەڭ-كەزەڭىمەن ەنگىزۋ جۇمىستارى باستالعان.
اگەنتتىكتىڭ مەملەكەتتىك قىزمەت كورسەتۋ ساپاسىن باقىلاۋ جانە باسقارۋ جۇيەسىن بيۋروكراتيادان ارىلتۋ سالالارىنا قاتىستى جۇمىستارى تۋرالى اقپارات بەردى.
پرەزيدەنت سەرۆيستىك جانە ادامدارعا بەيىمدەلگەن مەملەكەتتىك اپپاراتتى قالىپتاستىرۋ، مەملەكەتتىك قىزمەتشىلەردىڭ كاسىبي بىلىكتىلىگىن ارتتىرۋ جانە مەملەكەتتىك قىزمەت جۇيەسىنە زاماناۋي تەحنولوگيالاردى ەنگىزۋ ءىسىن جالعاستىرۋدى تاپسىردى.
