پرەزيدەنت مەملەكەتتىك ناگرادالار تاپسىردى
استانا. KAZINFORM - قاسىم-جومارت توقايەۆ مەملەكەت جانە قوعام قايراتكەرى راۆيل شىردابايەۆقا «وتان» وردەنىن، قازاقستاننىڭ ەڭبەك سىڭىرگەن قايراتكەرى سەرىك توقپانوۆقا I دارەجەلى «بارىس» وردەنىن سالتاناتتى تۇردە تابىستادى. بۇل تۋرالى اقوردانىڭ باسپا ءسوز قىزمەتى حابارلادى.
ءىس-شارادا سويلەگەن سوزىندە پرەزيدەنت حالقىمىز راۆيل شىردابايەۆتى ەگەمەندىك جىلدارىنان باستاپ ەلدىك ىستەرگە بەلسەنە قاتىسقان ءارى مەملەكەتتىگىمىزدى نىعايتۋعا زور ۇلەس قوسقان ازامات دەپ ايرىقشا قۇرمەتتەيتىنىن ايتتى.
- اسىرەسە، مۇناي- گاز سالاسىن وركەندەتۋگە مول ەڭبەك ءسىڭىردىڭىز. ءسىزدىڭ باستاماڭىزبەن بۇل سالا جاڭا كەزەڭگە قادام باستى دەۋگە بولادى. مينيستر، وبلىس اكىمى، دەپۋتات رەتىندە ۇلت مۇددەسىنە ادال قىزمەت ەتتىڭىز. ديپلوماتيا سالاسىندا جۇمىس ىستەپ، ەلىمىزدىڭ حالىقارالىق بەدەلىن نىعايتۋعا اتسالىستىڭىز. سونداي- اق ءسىز - مۇناي وندىرىسىنە ارنالعان بىرنەشە عىلىمي ەڭبەكتىڭ اۆتورىسىز. حالقىمىز «ەڭبەگىمەن ەر سىيلى» دەگەن. ءسىزدىڭ ەرەن ەڭبەگىڭىز - وسكەلەڭ بۋىن ءۇشىن ۇلگى- ونەگە، - دەدى مەملەكەت باسشىسى.
سونىمەن قاتار پرەزيدەنت بىلىكتى دارىگەر، «التىن قولدى حيرۋرگ» رەتىندە سەرىك توقپانوۆتىڭ سانالى عۇمىرىن ۇلت ساۋلىعى ءۇشىن ەڭبەك ەتۋگە ارناعانىنا توقتالدى.
- دەنساۋلىق ساقتاۋ جۇيەسىندە ەلۋ جىلدان استام ۋاقىت بويى قىزمەت ەتىپ كەلەسىز. دارىگەر بولۋ - ماماندىققا ادال بولۋ دەگەن ءسوز. بۇل - جۇگى اۋىر، كۇردەلى جۇمىس. ءسىز ەڭبەك جولىڭىزدا اسا كۇردەلى وتالار جاساپ، مىڭداعان ادامنىڭ ءومىرىن ساقتاپ قالدىڭىز. ناعىز جاناشىر دارىگەر بولدىڭىز. قازاقستاننىڭ مەديتسينا عىلىمىن دامىتۋعا وراسان زور ۇلەس قوستىڭىز. سىزدەرگە بەرىلەتىن بۇگىنگى جوعارى مەملەكەتتىك ماراپات - ەل يگىلىگى ءۇشىن جاسالعان تاباندى ەڭبەكتىڭ لايىقتى جەمىسى. بۇل - جۇرتىمىزدىڭ شىنايى ىقىلاسى جانە زور العىسى، - دەدى قاسىم-جومارت توقايەۆ.
راۆيل شىردابايەۆ پەن سەرىك توقپانوۆ جوعارى مەملەكەتتىك ماراپاتتارعا لايىق كورگەنى ءۇشىن پرەزيدەنتكە العىس ايتتى.
ايتا كەتەلىك وسى اپتادا پرەزيدەنت قاسىم-جومارت توقايەۆتىڭ قاتىسۋىمەن قانداي شارالار وتەتىنىنىن حابارلاعان ەدىك.
