پرەزيدەنت مارات قارابايەۆقا ترانس كاسپي حالىقارالىق كولىك ءدالىزىن دامىتۋدى تاپسىردى

استانا. KAZINFORM - مەملەكەت باسشىسى كولىك ءمينيسترى مارات قارابايەۆتى قابىلدادى. قاسىم-جومارت توقايەۆقا مينيسترلىكتىڭ وتكەن جىلى اتقارعان جۇمىسىنىڭ قورىتىندىسى بويىنشا ەسەپ بەرىلىپ، الداعى كەزەڭگە ارنالعان جوسپارى تانىستىرىلدى. بۇل تۋرالى اقوردا ءمالىم ەتتى.

مارات قارابايەۆتىڭ ايتۋىنشا، بىلتىر كولىكتىڭ بارلىق ءتۇرى بويىنشا تاسىمال كولەمى 6 پايىزعا وسكەن. ترانس كاسپي حالىقارالىق كولىك ءدالىزى ارقىلى جۇك تاسىمالداۋ 62 پايىزعا ۇلعايىپ، 4,5 ميلليون توننانى قۇرادى. الماتى، قىزىلوردا جانە شىمكەنت قالالارىنىڭ اۋەجايلارىندا 3 جاڭا جولاۋشىلار تەرمينالى سالىندى. 12 مىڭ شاقىرىم جول جوندەلدى. قاراعاندى - الماتى، تالدىقورعان - وسكەمەن، اقتوبە - قاندىاعاش جانە اتىراۋ - استراحان تاس جولدارىنداعى جاڭعىرتۋ جۇمىستارى اياقتالدى.

ءمينيستردىڭ مالىمەتىنشە، وتاندىق اۋە كومپانيالارى 14,7 ميلليون جولاۋشىنى تاسىمالداعان. بۇل سەكتورداعى كورسەتكىش 10 پايىزعا ۇلعايعان. اۋەجايلاردا 29,7 ميلليون ادامعا قىزمەت كورسەتىلگەن، ياعني 14 پايىزعا ارتقان. تەمىرجول كولىگىمەن 21 ميلليون جولاۋشى تاسىمالدانىپ، ءوسىم 3,9 پايىزدى قۇراعان.

- قاسىم-جومارت توقايەۆقا بيىل ۆەدومستۆونىڭ ەۋروپا، ازيا جانە تاياۋ شىعىس ەلدەرىنە 19 جاڭا اۋە باعىتىن اشۋدى جوسپارلاپ وتىرعانى جونىندە باياندالدى. كاتونقاراعاي، زايسان جانە كەندىرلى اۋەجايلارىنىڭ قۇرىلىسى باستالدى. سونىمەن قاتار 125 تەمىرجول بەكەتىن جاڭعىرتۋ جۇمىستارى قولعا الىنادى. دوستىق - مويىنتى، الماتى اينالما تەمىرجولى، داربازا - ماقتاارال، اياگوز - باقتى جانە قىزىلجار - مويىنتى سەكىلدى 5 ءىرى تەمىرجول جوباسى جۇزەگە اسىرىلىپ جاتىر، - دەلىنگەن حابارلامادا.

كەزدەسۋ سوڭىندا پرەزيدەنت قازاقستاندىقتاردىڭ جول جۇرۋىنە اناعۇرلىم قولايلى جاعداي جاساۋ، تۋريستىك نىساندارعا قولجەتىمدىلىكتى قامتاماسىز ەتۋ قاجەت ەكەنىن اتاپ ءوتتى.

مەملەكەت باسشىسى ورتالىق - باتىس اۆتوجولىنىڭ قۇرىلىسىن جەدەلدەتۋ، باتىس ەۋروپا - باتىس قىتاي ءدالىزىن كەڭەيتۋ، ترانس كاسپي حالىقارالىق كولىك ءدالىزىن دامىتۋ، ىشكى جانە حالىقارالىق اۋە رەيستەرىنىڭ سانىن كوبەيتۋ، كولىك سەكتورىنا ينۆەستيتسيا تارتۋ جۇمىسىن كۇشەيتۋ جونىندە تاپسىرما بەردى.

قاسىم-جومارت توقايەۆ كولىك-لوگيستيكا سالاسىن وركەندەتۋدىڭ، سونداي-اق كولىك ينفراقۇرىلىمىن جاڭعىرتۋ جوبالارىن ساپالى ءارى ۋاقتىلى جۇزەگە اسىرۋدىڭ ماڭىزىنا ەرەكشە نازار اۋداردى.

بۇعان دەيىن حابارلانعانداي، پرەزيدەنتتىڭ جارلىعىمەن ءبىر توپ عالىم مەملەكەتتىك ناگرادالارمەن ماراپاتتالدى.