پرەزيدەنت ماكروندى فرانسيانىڭ ۇلتتىق مەرەكەسىمەن قۇتتىقتادى
استانا. KAZINFORM - مەملەكەت باسشىسى فرانسيا پرەزيدەنتىنە قۇتتىقتاۋ جەدەلحاتىن جولدادى، دەپ حابارلايدى اقوردانىڭ باسپا ءسوز قىزمەتى.
قاسىم-جومارت توقايەۆ ەممانيۋەل ماكروندى فرانتسۋز رەسپۋبليكاسىنىڭ ۇلتتىق مەرەكەسى - باستيليانى الۋ كۇنىمەن قۇتتىقتادى.
- مەملەكەت باسشىسى بۇگىندە فرانسيا ساياسي، الەۋمەتتىك-ەكونوميكالىق، مادەني-گۋمانيتارلىق سالالاردا ەلەۋلى جەتىستىككە جەتكەن حالىقارالىق قوعامداستىقتىڭ بەدەلدى مۇشەسى ەكەنىن اتاپ ءوتىپ، دوستاس فرانسۋز حالقىنىڭ ودان ءارى ءوسىپ-وركەندەي بەرۋىنە تىلەكتەستىك ءبىلدىردى، - دەلىنگەن حابارلامادا.
سونداي-اق قازاقستان مەن فرانسيا قارىم-قاتىناسى ستراتەگيالىق سەرىكتەستىككە ۇلاسقانىنا نازار اۋدارىپ، وسى يگى ىسكە ەممانيۋەل ماكروننىڭ قوسقان ۇلەسىن جوعارى باعالايتىنىن جەتكىزدى.
بۇعان دەيىن قاسىم-جومارت توقايەۆ موڭعوليا پرەزيدەنتىن ناادام مەرەكەسىمەن قۇتتىقتاعان ەدى.
