پرەزيدەنت: ۇلى جەڭىس - تاريحىمىزدىڭ اجىراماس بولىگى
استانا. KAZINFORM - ۇلى جەڭىس - تاريحىمىزدىڭ اجىراماس بولىگى جانە كۇللى الەم ءۇشىن ۇلكەن ساباق. بۇل تۋرالى مەملەكەت باسشىسى قاسىم-جومارت توقايەۆ ەلوردادا ءوتىپ جاتقان ۇلى جەڭىستىڭ 80 جىلدىعىنا ارنالعان اسكەري پارادتا ايتتى.
- بيىل ۇلى جەڭىسكە - 80 جىل! بارشاڭىزعا ۇلى جەڭىس كۇنى قۇتتى بولسىن! بۇل مەيرام - حالقىمىزدىڭ جاۋىنگەرلىك رۋحىنىڭ سيمۆولى. ءبىز ەلدىك ءۇشىن كۇرەسكەن باتىر بابالاردى ۇلىقتايمىز. وتان قورعاۋ جولىندا وپات بولعان بوزداقتارعا تاعزىم ەتەمىز. بەيبىت كۇندى قىراعى كۇزەتىپ تۇرعان ساربازدارعا قۇرمەت كورسەتەمىز. ۇلى وتان سوعىسى بۇكىل ادامزات ءۇشىن وتە قيىن سىناق بولدى. ونىڭ زاردابى كوپتەگەن ەلگە اۋىر ءتيدى، سولاردىڭ ىشىندە قازاقستان دا بار. قاھارلى كۇندەر سوعىستىڭ تەك قاسىرەت اكەلەتىنىن كورسەتتى. بەيبىتشىلىكتىڭ باعا جەتپەس بايلىق ەكەنىن ۇعىندىردى. ۇلى جەڭىس - تاريحىمىزدىڭ اجىراماس بولىگى جانە كۇللى الەم ءۇشىن ۇلكەن ساباق. ءبىز وسى اقيقاتتى ءاردايىم ەستە ساقتاۋىمىز كەرەك، - دەدى مەملەكەت باسشىسى.
پرەزيدەنت زۇلمات كەزەڭدى باستان وتكەرگەن مايدانگەرلەر قازىر پارادتى كورۋگە كەلگەنىنە توقتالدى.
- قۇرمەتتى ارداگەرلەر، بارشا حالىقتىڭ اتىنان سىزدەرگە شىن جۇرەكتەن العىس ايتامىن! اعا بۋىننىڭ وشپەس ەرلىگى - ۇرپاققا ۇلاعات. وتانشىلدىعى مەن جانقيارلىعى - ۇلگى- ونەگە. ءبىز ۇلى وتان سوعىسىنىڭ ارداگەرلەرىن ەشقاشان ۇمىتپايمىز! بارشاڭىزعا باس يەمىز! - دەدى قاسىم-جومارت توقايەۆ.
استانادا اسكەري پاراد باستالعانىن جازعان بولاتىنبىز.
