پرەزيدەنت ەكىنشى دەڭگەيلى بانكتەرمەن بىرلەسىپ، ەكونوميكانىڭ ناقتى سەكتورىن قارجىلاندىرۋدى تاپسىردى

استانا. KAZINFORM - پرەزيدەنت «بايتەرەك» ۇلتتىق باسقارۋشى حولدينگى» ا ق باسقارما ءتوراعاسى رۋستام قاراعويشيندى قابىلدادى. بۇل تۋرالى اقوردا ءمالىم ەتتى.

قاسىم-جومارت توقايەۆقا حولدينگتىڭ بىلتىر اتقارعان جۇمىسى تۋرالى ەسەپ بەرىلىپ، بيىلعى جوسپارى تانىستىرىلدى.

باسقارما ءتوراعاسىنىڭ ايتۋىنشا، وتكەن جىلى حولدينگ تاراپىنان 6 تريلليون تەڭگەگە جۋىق قولداۋ كورسەتىلگەن. ونىڭ 4,1 تريلليون تەڭگەسى ءىرى، ورتا جانە شاعىن بيزنەسكە، ال 1,9 تريلليون تەڭگەسى تۇرعىن ءۇي-قۇرىلىس سەكتورىنا باعىتتالعان.

- قاسىم-جومارت توقايەۆقا بىلتىر حولدينگتىڭ اكتيۆتەرى 14,1 تريلليون تەڭگەگە جەتكەنى جونىندە باياندالدى. ينۆەستيتسيالىق جانە نەسيە پورتفەلى 10,3 تريلليون تەڭگەگە دەيىن ۇلعايىپ، تازا تابىس 416 ميلليارد تەڭگەنى قۇرادى. رۋستام قاراعويشيننىڭ ايتۋىنشا، بۇل قارجىنى حولدينگتىڭ كومپانيالار توبى اياسىنداعى باعدارلامالاردى ىسكە اسىرۋعا جۇمساۋ جوسپارلانىپ وتىر، - دەلىنگەن حابارلامادا.

قاسىم-جومارت توقايەۆقا «دامۋ» كاسىپكەرلىكتى دامىتۋ قورى» بازاسىندا ەكى كەپىلدىك قورى ىسكە قوسىلعانى تۋرالى مالىمەت بەرىلدى. ونىڭ ءبىرى شاعىن جانە ورتا بيزنەستى قولداۋعا ارنالعان، ال ەكىنشىسى قۇنى 7 ميلليارد تەڭگەدەن اساتىن ءىرى جوبالاردى قارجىلاندىرۋدى كوزدەيدى.

بۇدان بولەك، پرەزيدەنتكە تىكەلەي ينۆەستيتسيا تارتۋ بويىنشا ءبىرقاتار باستاما، سونىڭ ىشىندە شەتەلدىك سەرىكتەستەرمەن بىرلەسكەن قورلار ارقىلى اۋىل شارۋاشىلىعى، وڭدەۋ جانە تاۋ-كەن مەتاللۋرگياسى سالالارىندا جوبالار جۇزەگە اسىرىلاتىنى جونىندە مالىمەت بەرىلدى. اتالعان قورلار «استانا» حالىقارالىق قارجى ورتالىعىنىڭ يۋريسديكتسياسىندا قۇرىلادى.

مەملەكەت باسشىسى ەلىمىزدىڭ ورنىقتى ەكونوميكالىق دامۋى ءۇشىن ۇسىنىلىپ وتىرعان باستامالاردى ورىنداۋدىڭ ماڭىزىن اتاپ ءوتتى.

قاسىم-جومارت توقايەۆ «بايتەرەك» حولدينگىنە ەكىنشى دەڭگەيلى بانكتەرمەن بىرلەسىپ، ەكونوميكانىڭ ناقتى سەكتورىن قارجىلاندىرۋدى، ەنەرگەتيكالىق جانە كوممۋنالدىق سەكتورلاردى جاڭعىرتۋ ۇلتتىق جوباسىن ىسكە اسىرۋعا قارجى تارتۋ ماسەلەسىن شەشۋدى تاپسىردى. پرەزيدەنت العا قويىلعان جوسپارلاردى ءتيىمدى ىسكە اسىرۋ قاجەت ەكەنىنە باسا نازار اۋداردى.

ەسكە سالا كەتەيىك، بۇعان دەيىن «بايتەرەك» ۇ ب ح باسقارما ءتوراعاسى رۋستام قاراعويشين قىتايدان قانشا يۋان قارىز العانىن جانە ونى قايدا جۇمسايتىنىن ايتىپ بەرگەن ەدى.