پرەزيدەنت ەكولوگ، ECO Network جوباسىنىڭ جەتەكشىسى ەۆگەني مۇحامەدجانوۆتى قابىلدادى
الماتى. KAZINFORM - مەملەكەت باسشىسى قاسىم-جومارت توقايەۆ ECO Network جوباسىنىڭ جەتەكشىسى ەۆگەني مۇحامەدجانوۆپەن كەزدەستى. بۇل تۋرالى اقوردانىڭ باسپا ءسوز قىزمەتى حابارلادى.
كەزدەسۋ بارىسىندا ەكولوگيالىق مادەنيەتتى قالىپتاستىرۋ جانە قورشاعان ورتا پروبلەمالارىن شەشۋ ىسىنە ازاماتتاردى، ۇكىمەتتىك ەمەس ۇيىمدار مەن بيزنەستى كەڭىنەن تارتۋ ماسەلەلەرى تالقىلاندى.
قاسىم-جومارت توقايەۆ ەۆگەني مۇحامەدجانوۆتىڭ باستاماسىمەن جۇزەگە اسىرىلىپ جاتقان ECO Network جوباسىن وڭ باعالادى. مەملەكەت باسشىسى، ەڭ الدىمەن، ادامنىڭ مادەنيەتىن، ونىڭ قورشاعان ورتامەن قارىم-قاتىناسىن قالىپتاستىرۋدى، سونداي-اق تۇرمىستىق قالدىقتاردى بولەك سۇرىپتاۋ جانە قايتا وڭدەۋدى كوزدەيتىن «ەكوحاب»، «جاسىل كەڭسە»، «جاسىل مەكتەپ» باعىتتارى ەكومادەنيەتتى دارىپتەۋدىڭ ءتيىمدى تەتىگى رەتىندە جاپپاي تاراتۋعا لايىق تاجىريبە ەكەنىن اتاپ ءوتتى.
ەۆگەني مۇحامەدجانوۆتىڭ ايتۋىنشا، قازىردىڭ وزىندە ECO Network جوباسىنا قازاقستان بويىنشا جۇزدەگەن كومپانيا مەن وقۋ ورىندارى قوسىلعان. ولار بيزنەس پروتسەستەرىنە ەكوستاندارتتاردى ەنگىزىپ، ەكونوميكانى دەكاربونيزاتسيالاۋ ۇدەرىسىنە ەلەۋلى ۇلەس قوسىپ جاتىر.
پرەزيدەنت ەكولوگتىڭ باستامالارى جالپى ۇلتتىق «تازا قازاقستان» ەكولوگيالىق اكسياسىنىڭ يدەولوگياسىمەن ۇندەس ەكەنىنە نازار اۋداردى. قاسىم-جومارت توقايەۆ ەۆگەني مۇحامەدجانوۆتىڭ «جاسىل الماتى» جوبالىق كەڭسەسىنىڭ جەتەكشىسى رەتىندە شاھاردىڭ ەكولوگيالىق ماسەلەلەرىن شەشۋدىڭ ءتيىمدى ءارى كرەاتيۆتى تاسىلدەرىن جۇزەگە اسىراتىنىنا سەنىم ءبىلدىردى.
