پرەزيدەنت كوكشەتاۋ قالاسىنىڭ 2050 -جىلعا دەيىنگى باس جوسپارىمەن تانىستى
استانا. KAZINFORM - قاسىم-جومارت توقايەۆقا باس جوسپار اياسىندا جىلۋ ەلەكتر ورتالىعى، وبلىستىق كوپ بەيىندى اۋرۋحانا، ازاماتتىق قورعانىس اكادەمياسى جانە كوپ فۋنكسيونالدى سپورت كەشەنى سالىنىپ جاتقانى جونىندە باياندالدى. بۇدان بولەك، الپىسقا جۋىق ونەركاسىپ كاسىپورنىنا ەسەپتەلگەن يندۋستريالىق ايماقتىڭ نەگىزى قالانىپ جاتىر. بۇل تۋرالى اقوردانىڭ باسپا ءسوز قىزمەتى حابارلادى.
وبلىس ورتالىعىنىڭ اۋماعى 7 مىڭ گەكتارعا ۇلعايادى. باس جوسپارداعى ەرەكشە نىساننىڭ ءبىرى - قوپا كولىنىڭ جاعاسىندا بوي كوتەرەتىن زاماناۋي ىسكەرلىك ورتالىق. وندا تۇرعىن ءۇي كەشەندەرى، بيزنەس جانە ساۋدا ورتالىقتارى، الەۋمەتتىك نىساندار مەن قوعامدىق كەڭىستىكتەر ورنالاسادى.
مەجەلى ۋاقىتقا دەيىن قالا حالقىنىڭ سانى 500 مىڭعا جەتەدى دەپ جوسپارلانىپ وتىر. تۇرعىندارعا قولايلى جاعداي جاساۋ ءۇشىن جاڭا قۇرىلىس الاڭدارى جانە رەنوۆاتسيا باعدارلاماسى اياسىندا 10 ميلليون شارشى مەترگە جۋىق تۇرعىن ءۇي پايدالانۋعا بەرىلمەك.
پرەزيدەنتكە كوكشەتاۋ قالاسىندا تابىستى ىسكە اسىرىلىپ جاتقان بەس جىلدىق رەنوۆاتسيا باعدارلاماسى جونىندە مالىمەت بەرىلدى.
جوبانىڭ ماقساتى - اپاتتى ۇيلەردىڭ تۇرعىندارىن زاماناۋي، جايلى ءارى قۋات ۇنەمدەيتىن پاتەرلەرگە كوشىرۋ، سونداي-اق ينجەنەرلىك جەلىلەردى، اۋلالار مەن قوعامدىق كەڭىستىكتەردى كەشەندى تۇردە جاڭعىرتۋ. اتالعان باعدارلامانىڭ وپەراتورى - Kokshe الەۋمەتتىك- كاسىپكەرلىك كورپوراتسياسى.
قازىرگى ۋاقىتتا 13 ەسكى ءۇي بۇزىلىپ، ورنىنا 2 توعىز قاباتتى جانە 4 بەس قاباتتى كوپپاتەرلى ءۇي سالىندى. جاڭا باسپاناعا 365 وتباسى قونىستاندى.
2029 -جىلعا دەيىن 175 ەسكى ءۇيدى بۇزۋ جوسپارلانىپ وتىر. ونىڭ ورنىنا 3500 پاتەرگە ەسەپتەلگەن 35 زاماناۋي تۇرعىن ءۇي بوي كوتەرەدى. ناتيجەسىندە 11 مىڭعا جۋىق ادام جاڭا قونىسقا كوشەدى.
مەملەكەت باسشىسى جاڭا ستاديوندى كەمىندە 10 مىڭ كورەرمەنگە لايىقتاپ سالۋ جونىندە تاپسىرما بەردى.
ايتا كەتەيىك، مەملەكەت باسشىسى اقمولا وبلىسىنىڭ زەرەندى اۋدانىندا ايماق شارۋالارىمەن ەگىن جيناۋ ناۋقانىنا ارنالعان كەڭەس وتكىزدى.
اۆتور
ەلميرا ورالبايەۆا
