پرەزيدەنت جولداردىڭ ساپاسى جايلى: ازىرگە جاعداي ءماز ەمەس

استانا. KAZINFORM - رەسپۋبليكالىق ماڭىزى بار جولداردى سالۋعا وتاندىق كاسىپورىنداردى تارتۋ كەرەك. بۇل تۋرالى ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ايتتى.

«كەلەسى - اۆتوجول ماسەلەسى. ەلىمىز ءۇشىن ايرىقشا ماڭىزدى «استانا-بالقاش-الماتى» تاس جولى ءالى كۇنگە دەيىن جوندەلىپ بىتكەن جوق. قۇرىلىس 2017-جىلدان بەرى ءجۇرىپ جاتىر. رەسپۋبليكالىق ماڭىزى بار «اتىراۋ-استراحان»، «اقتوبە-قاندى اعاش»، «تالدىقورعان-وسكەمەن» جولدارىنىڭ جوندەلىپ جاتقانىنا 5 جىلدان استى. بيىل وسى جۇمىستار ءبىرجولا اياقتالۋعا ءتيىس»، - دەدى قاسىم-جومارت توقايەۆ.

پرەزيدەنت وسى ورايدا بىرنەشە ماسەلەنى ەسكەرۋ قاجەتتىگىن ايرىقشا ايتتى.

«قالىپتاسقان تاجىريبەگە قاراساق، رەسپۋبليكالىق ماڭىزى بار جولداردىڭ تەندەرىن كوپ جاعدايدا تەك شەتەل كومپانيالارى ۇتىپ الادى. مۇنداي جوبالارعا قولىنان ءىس كەلەتىن، ءتيىستى تەحنيكامەن جابدىقتالعان ءوز كاسىپورىندارىمىزدى تارتۋ كەرەك. سونىمەن قاتار، جول قۇرىلىسىنا قاجەتتى تەحنيكانى ەلىمىزدە شىعارۋ جولدارىن دامىتىپ، ءوزىمىزدىڭ دايىن ءونىمدى پايدالانۋ كەرەك. جالپى، جول ماسەلەسىنە كەلگەندە ءبىر عانا ماقسات بولۋعا ءتيىس. رەسپۋبليكالىق نەمەسە ايماقتىق جول بولسىن، ەلىمىزدەگى جولدىڭ ءبارى ساپالى بولۋى كەرەك. ازىرگە جاعداي ءماز ەمەس»، - دەدى مەملەكەت باسشىسى.

اۆتور

مارلان جيەمباي