پرەزيدەنت: جۇرگىزۋشى كۋالىگىن وقىماي-اق الاتىندار بار

استانا. KAZINFORM - مەملەكەت باسشىسى قاسىم-جومارت توقايەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا جۇرگىزۋشىلەردى دايارلاۋ دەڭگەيىنىڭ دە تومەندەپ كەتكەنىن ايتتى.

«جول اپاتتارى قوعامنىڭ زور الاڭداۋشىلىعىن تۋعىزىپ وتىر. جىل باسىنان بەرى جول-كولىك وقيعاسىنان 1300-دەن استام ادام قازا بولىپ، 16 مىڭنان استام ازامات زارداپ شەكتى. ادامدار كۇن سايىن جول ۇستىندە قازاعا ۇشىراپ جاتىر. ولاردىڭ اراسىندا تۇتاس وتباسىلار دا بار.

جۇرگىزۋشىلەردى دايارلاۋ دەڭگەيىنىڭ دە تومەندەپ كەتكەنى جاسىرىن ەمەس. جۇرگىزۋشى كۋالىگىن ارنايى وقىماي-اق الاتىن جايتتار بار. ۇكىمەت، اكىمدەر، ىشكى ىستەر مينيسترلىگى باتىل قادام جاساۋى كەرەك. دەپۋتاتتار بۇل ماسەلەنى نازاردا ۇستاۋعا ءتيىس»، - دەدى پرەزيدەنت.

قاسىم-جومارت توقايەۆ اسكەر قاتارىندا زاڭ مەن ءتارتىپتىڭ ساقتالۋىنا دا توقتالدى.

«جاستار اسكەرگە وتان الدىنداعى بورىشىن وتەۋگە بارادى. جاس ساربازدارىمىز ءوز مىندەتىن الاڭسىز ورىنداۋى ءۇشىن اسكەر قاتارىندا، ەڭ الدىمەن، تەمىردەي ءتارتىپ بولۋعا ءتيىس. قارۋلى كۇشتەر مەن باسقا دا كۇشتىك قۇرىلىمدار وسى تالاپتى مۇلتىكسىز ورىنداۋى قاجەت.

ءار اتا-انا اسكەرگە كەتكەن بالاسىن مەملەكەتكە سەنىپ تاپسىرادى. سوندىقتان ساربازداردىڭ دەنساۋلىعى مەن قاۋىپسىزدىگىنە، ەڭ الدىمەن، ارميا باسشىلىعى جانە قۇقىق قورعاۋ مەكەمەلەرىنىڭ باسشىلارى جاۋاپتى»، - دەدى مەملەكەت باسشىسى.

اۆتور
ەسىمجان ناقتىباي