پرەزيدەنت: جاساندى ينتەللەكت - ەلىمىزدىڭ باسەكەگە قابىلەتتىلىگىنىڭ كەپىلى
مەملەكەت باسشىسى ەلىمىزدە ەنەرگەتيكا، كولىك جانە سيفرلاندىرۋ سالالارىنداعى ينفراقۇرىلىمدى جاپپاي دامىتۋ ءۇشىن قابىلدانىپ جاتقان شارالارعا توقتالدى.
- قازاقستان حالىقارالىق سەرىكتەستەرمەن بىرگە تەمىرجول جانە اۆتوكولىك دالىزدەرىن، تەڭىز پورتتارىن، جالپى ترانزيت جانە لوگيستيكا سالاسىن جاڭعىرتۋدى بەلسەندى تۇردە قولعا الدى. تسيفرلىق ترانسفورماتسيا مەن جاساندى ينتەللەكت - ەلىمىزدىڭ باسەكەگە قابىلەتتىلىگىنىڭ كەپىلى. ءبىز قازاقستاندى سيفرلىق مەملەكەتكە اينالدىرعىمىز كەلەدى. ويتكەنى جاساندى ينتەللەكت ءوسىمى يننوۆاتسيا مەن سيفرلىق دەربەستىكتىڭ نەگىزگى قوزعاۋشى كۇشى بولادى. وسى ستراتەگيالىق ماڭىزى زور سالاعا كۇش-جىگەرىمىزدى جۇمىلدىرۋ ءۇشىن جاساندى ينتەللەكتىنى دامىتۋ جونىندەگى كەڭەس قۇردىق. كوپ ۇزاماي قۋاتتى سۋپەركومپيۋتەردى ىسكە قوسامىز، - دەدى پرەزيدەنت.
قاسىم-جومارت توقايەۆ اۋىل شارۋاشىلىعىن جاڭعىرتۋدى تاعى ءبىر ستراتەگيالىق باعىت رەتىندە اتادى. ەل ەكونوميكاسىن ءارتاراپتاندىرۋعا جانە ازىق- تۇلىك قاۋىپسىزدىگىن قامتاماسىز ەتۋگە اتالعان سالانىڭ ىقپالى زور.
- ءبىز جاھاندىق قوسىلعان قۇن تىزبەگىمەن تولىق ينتەگراتسيالانعان، سونداي-اق كليمات پەن ورنىقتى دامۋ سالاسىنداعى ماقساتتارعا ساي كەلەتىن تۇراقتى ەكونوميكانىڭ نەگىزىن قالاپ جاتىرمىز. بۇل ۇزاقمەرزىمدى ماقساتقا جەتۋ ءۇشىن حالىقارالىق سەرىكتەستەرمەن تىعىز ىنتىماقتاستىق قۇرۋعا مۇددەلىمىز. ورايلى ءساتتى پايدالانىپ، وسى ماڭىزدى باستامانى جۇزەگە اسىرۋعا ۇلەس قوسقان ديپلوماتتار قاۋىمىنىڭ ايرىقشا ءرولىن اتاپ وتكىم كەلەدى، - دەدى مەملەكەت باسشىسى.
ءسوز سوڭىندا قاسىم-جومارت توقايەۆ بارشا اوسشك قاتىسۋشىلارىنا تابىس تىلەپ، ۇيىمعا جوعارى دەڭگەيدە ءتوراعالىق جاساعانى، ديالوگتى نىعايتۋداعى ولشەۋسىز كۇش-جىگەرى، ا و س ش ك- ءنىڭ ينستيتۋتتىق دامۋىنا قوسقان ۇلەسى ءۇشىن قازاقستاننىڭ سەنىمدى دوسى - ازەربايجان ەلىنە العىس ايتتى.
ايتا كەتەيىك، مەملەكەت باسشىسى استاناداعى اوسشك شتاب-پاتەرىنىڭ اشىلۋ راسىمىنە قاتىستى.
پرەزيدەنت ءىس-شاراعا جينالعان قاۋىم الدىندا ءسوز سويلەپ، ەلىمىزدەگى ديپلوماتيا سالاسىنىڭ قىزمەتكەرلەرى مەن ارداگەرلەرىن كاسىبي مەرەكەلەرىمەن قۇتتىقتادى.
