پرەزيدەنت حالىقتىڭ قارجىلىق ساۋاتىن ارتتىرۋدى تاپسىردى
استانا. KAZINFORM - پرەزيدەنت قارجىلىق مونيتورينگ اگەنتتىگىنىڭ ءتوراعاسى جانات ەليمانوۆتى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.
قاسىم-جومارت توقايەۆقا اگەنتتىك قىزمەتىنىڭ نەگىزگى قورىتىندىلارى تۋرالى ەسەپ بەرىلىپ، الداعى كەزەڭگە ارنالعان مىندەتتەرى تانىستىرىلدى.
مەملەكەت باسشىسىنا 300 قىلمىستىق ءىستى تەرگەپ-تەكسەرۋ اياقتالعانى جونىندە باياندالدى. زارداپ شەككەن ازاماتتارعا 20 ميلليارد تەڭگەگە جۋىق وتەماقى قايتارىلدى. قارجى پيراميدالارىن ۇيىمداستىرۋشىلاردىڭ 2,2 ميلليارد تەڭگە بولاتىن كريپتوۆاليۋتا تۇرىندەگى قىلمىستىق تابىستارى بۇعاتتالدى. ۇيىمداسقان 6 قىلمىستىق توپ جويىلعان. ولاردىڭ ءبىرى - ترانس ۇلتتىق توپ. ءىرى ينفراقۇرىلىمدىق جوبالاردى ىسكە اسىرۋدا 23 ميلليارد تەڭگە كولەمىندەگى بيۋدجەت قارجىسىنىڭ ماقساتسىز جۇمسالۋىنا جول بەرىلمەدى.
پرەزيدەنتكە اعاش پەن تەمىردىڭ زاڭسىز ەكسپورتتارىنىڭ جولى كەسىلگەنى تۋرالى باياندالدى. سونداي-اق جانار-جاعارمايدى زاڭسىز تاسىمالداۋدىڭ ءىرى سحەماسى جويىلعانى جايىندا ايتىلدى. بۇل ىشكى نارىقتاعى جاعدايدى تۇراقتاندىرۋعا مۇمكىندىك بەردى.
جانات ەليمانوۆ ازاماتتاردى قارجى الاياقتارىنان قورعاۋ، قارىز جۇكتەمەسىن ازايتۋ بويىنشا قابىلدانىپ جاتقان شارالار تۋرالى مالىمدەدى. زاڭسىز جۇمىس ىستەگەن شاعىن قارجى ۇيىمدارىنىڭ جەلىسى انىقتالدى. ولاردان 327 مىڭ ازامات زارداپ شەككەن. كەلتىرىلگەن زالال مولشەرى 30 ميلليارد تەڭگەنى قۇرايدى. 24 قارجى پيراميداسى جويىلدى. الدىن الۋ ماقساتىندا الاياقتىق سحەمالاردى تاراتقان 5,6 مىڭ سايت بۇعاتتالىپ، 22 مىڭنان استام مۇشەسى بار 30 توپتىق چات پەن اككاۋنت جابىلعان.
قاسىم-جومارت توقايەۆقا جاستاردى قىلمىستىق سحەمالارعا تارتۋدىڭ الدىن الۋ ءۇشىن جۇرگىزىلىپ جاتقان پروفيلاكتيكالىق شارالار جونىندە اقپارات بەرىلدى. اتاپ ايتقاندا، 2,8 مىڭ وقۋ ورنىنداعى 567 مىڭ وقۋشىعا قارجىلىق قاۋىپسىزدىك بويىنشا ساباقتار وتكىزىلگەن. مۇنداي جۇمىستار 100 جوعارى وقۋ ورنىندا جۇرگىزىلىپ، 100 مىڭنان استام ستۋدەنتتى قامتىعان.
بۇدان بولەك، جانات ەليمانوۆ پارلامەنت ءماجىلىسىنىڭ قاراۋىنا كىرىستەردى جىلىستاتۋعا قارسى كۇرەس ماسەلەلەرى بويىنشا زاڭنامالىق تۇزەتۋلەر ەنگىزىلگەنىن حابارلادى. ولار قابىلدانسا، قازاقستان FATF ستاندارتتارىنا تەحنيكالىق تۇرعىدان تولىق ساي كەلەدى.
مەملەكەت باسشىسى ەكونوميكالىق قۇقىق بۇزۋشىلىقتىڭ الدىن الۋدى، كولەڭكەلى اينالىمنىڭ ۇلەسىن ازايتۋدى، زاڭسىز يەلەنگەن اكتيۆتەردى جىلىستاتۋعا قارسى كۇرەستى جالعاستىرۋدى، سونداي-اق حالىقتىڭ قارجىلىق ساۋاتىن ارتتىرۋدى تاپسىردى.
