پرەزيدەنت ديماشقا تازىنىڭ كۇشىگىن سىيلادى
قاسىم- جومارت توقايەۆ ءانشى ديماش قۇدايبەرگەنگە تازى كۇشىگىن سىيلادى، دەپ حابارلايدى Kazіnform.
ول بۇل جاڭالىقتى Instagram پاراقشاسىندا جەتكىزدى.
«دوستار، تانىسىپ قويىڭىزدار، بۇل - مەنىڭ جاڭا دوسىم. تابيعاتتىڭ بۇل عاجابىن، ياعني تازى كۇشىگىن ماعان قاسىم- جومارت كەمەل ۇلى سىيلادى. تازى - ءبىزدىڭ ۇلتىمىز ءۇشىن قۇندىلىق، بابادان قالعان «جەتى قازىنانىڭ» ءبىرى. قازىرگى كۇنى قازاقستاندا تازىنى ساقتاپ قالۋعا جانە حالىقارالىق دارەجەدە مويىنداۋعا باسا كوڭىل ءبولىنىپ جاتقانى قۋانتادى» دەپ جازدى قازاقستاندىق ورىنداۋشى پاراقشاسىندا.
ونىڭ ايتۋىنشا، بۇل قازاقى تۇقىم ءتان سۇلۋلىعىمەن، ۇستامدىلىعىمەن ەرەكشەلەنەدى جانە وتە اقىلدى كەلەدى.
«اتا-بابامىز تازىنى قاستەرلەپ، جاقسى كورگەن. بۇل ءيت كيىز ۇيگە ەركىن كىرە العان، بۇل ونىڭ تازالىعىن بىلدىرەدى. «تازى» اتاۋى پارسى تىلىنەن ەنگەن، ماعىناسى - «شاپشاڭ»، «ەپتى». وسىنداي باعا جەتپەس سىيلىق ءۇشىن پرەزيدەنتىمىزگە العىس ايتامىن! تازىنىڭ اتىن «عارىشكەر» دەپ اتادىق» دەپ جازادى ديماش قۇدايبەرگەن.
