پرەزيدەنت: ءبىز جۇرت بولىپ جۇمىلا بىلسەك، بيىك بەلەستەردى باعىندىرامىز
استانا. KAZINFORM - مەملەكەت باسشىسى قاسىم-جومارت توقايەۆ قازاقستان حالقىنىڭ بىرلىگى مەرەكەسىمەن قۇتتىقتاپ، بارشاعا باق- بەرەكە تىلەدى. بۇل تۋرالى اقوردانىڭ باسپا ءسوز قىزمەتى حابارلادى.
مەملەكەت باسشىسى قاسىم-جومارت توقايەۆتىڭ قازاقستان حالقىنىڭ بىرلىگى مەرەكەسىمەن قۇتتىقتاۋى
قۇرمەتتى وتانداستار!
قازاقستان حالقىنىڭ بىرلىگى مەرەكەسى قۇتتى بولسىن!
بۇل -مەملەكەتىمىز ءۇشىن ايرىقشا ءمانى بار مەيرام. جۇرتىمىز ورتاق قۇندىلىقتارعا نەگىزدەلگەن جاسامپاز ماقساتتارعا جەتۋ جولىندا بار كۇش- جىگەرىن جۇمىلدىرىپ، بولاشاققا سەنىممەن قادام باسىپ كەلەدى.
كەڭ بايتاق جەرىمىزدە ءتۇرلى ەتنوس وكىلدەرى ءوزارا كەلىسىمدە، تاتۋ-ءتاتتى ءومىر ءسۇرىپ جاتىر.
بيىل قازاقستان حالقى اسسامبلەياسىنىڭ قۇرىلعانىنا 30 جىل تولدى.
وسى بىرەگەي ۇيىم اۋەل باستان ەلىمىزدەگى بەيبىتشىلىك پەن تاتۋلىقتىڭ جارشىسىنا اينالدى. اسسامبلەيا ازاماتتارىمىزدىڭ ءوزارا قۇرمەتى مەن ىرىستى ىنتىماعىنا سۇيەنىپ، ۇلتتى ۇيىستىرۋعا ەلەۋلى ۇلەس قوسىپ كەلەدى.
حالقىمىزدىڭ اۋىزبىرشىلىگى مەن تىلەۋلەستىگىنىڭ ارقاسىندا مەملەكەتىمىز دامىپ، قولعا الىنعان اۋقىمدى رەفورمالار تابىستى جۇزەگە اسىرىلا بەرەدى.
ەلىمىز تەڭدىككە، ءوزارا سەنىمگە جانە مادەني ءارالۋاندىلىقتىڭ جاسامپاز الەۋەتىنە ارقا سۇيەپ، ەل بىرلىگىن ودان ءارى نىعايتا تۇسەدى.
ءبىز جۇرت بولىپ جۇمىلا بىلسەك، كەز-كەلگەن سىناقتى ەڭسەرىپ، بيىك بەلەستەردى باعىندىرامىز.
ۇلتىمىزدىڭ ارمان- مۇراتى - ادىلەتتى ءارى قۋاتتى قازاقستاندى بىرگە قۇرامىز.
بارشاڭىزعا باق-بەرەكە تىلەيمىن! بىرلىگىمىز بەكەم، اسپانىمىز اشىق بولسىن!
