پرەزيدەنت ءبىرقاتار زاڭ مەن كودەكسكە تۇزەتۋ ەنگىزەتىن زاڭعا قول قويدى
استانا. KAZINFORM - مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ورمان شارۋاشىلىعى، ەرەكشە قورعالاتىن تابيعي اۋماقتار جانە جەكە كاسىپكەرلىك سۋبەكتىلەرىنىڭ مىندەتتەمەلەرىنە كەپىلدىك بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.
بۇل تۋرالى اقوردانىڭ باسپا ءسوز قىزمەتى حابارلادى.
زاڭمەن جەر، ورمان، كاسىپكەرلىك، ەڭبەك جانە بيۋدجەت كودەكستەرىنە، سونداي-اق 9 زاڭعا تۇزەتۋلەر ەنگىزىلدى.
تۇزەتۋلەردىڭ بىرىنشى بلوگى ەرەكشە قورعالاتىن تابيعي اۋماقتار (ە ق ت ا) سالاسىنداعى زاڭنامانى جەتىلدىرۋگە باعىتتالعان. زاڭمەن ە ق ت ا جەرلەرىن وزگە ساناتتاعى جەرلەرگە اۋىستىرۋ نەگىزدەرى قايتا قارالدى.
تۇزەتۋلەردىڭ ەكىنشى بلوگى حالىقتىڭ قاۋىپسىزدىگىن قامتاماسىز ەتۋگە جانە ە ق ت ا اۋماقتارىندا قورشاعان ورتاعا زيان كەلتىرۋدىڭ الدىن الۋعا باعىتتالعان.
ءۇشىنشى بلوك استانا قالاسىنىڭ «جاسىل بەلدەۋىن» قورعاۋدى جانە ۇتىمدى پايدالانۋدى قامتاماسىز ەتۋگە باعىتتالعان.
تۇزەتۋلەردىڭ ءتورتىنشى بلوگى كومىرتەكتى وفسەتتەردىڭ ماسەلەلەرىن رەتتەيدى. زاڭ ورمان كودەكسى ەرەجەلەرىنىڭ قولدانىلۋى جاڭا ورمان ەكپەلەرىن وتىرعىزۋ، سونداي-اق توزعان جانە بۇزىلعان جەرلەردى قالپىنا كەلتىرۋ ارقىلى پارنيكتىك گازداردى سىڭىرۋگە باعىتتالعان مەملەكەتتىك ورمان قورى جەرلەرىندە ساتىلاتىن كومىرتەكتى وفسەتتەردى ساتۋ جونىندەگى قىزمەتكە تاراتىلدى.
تۇزەتۋلەردىڭ بەسىنشى بلوگى ە ق ت ا سالاسىنداعى قىزمەتكەرلەردىڭ الەۋمەتتىك قورعالۋىن قامتاماسىز ەتۋگە باعىتتالعان.
تۇزەتۋلەردىڭ التىنشى بلوگى بيزنەس سۋبەكتىلەرىنىڭ قارىزدارىنا كەپىلدىك بەرۋ جۇيەسىن ەنگىزۋدى كوزدەيدى. كەپىلدىك بەرۋ جۇيەسىنىڭ ماقساتى - كاسىپكەرلىك سۋبەكتىلەرىنە ەكىنشى دەڭگەيدەگى بانكتەردەن كرەديتتەر الۋ ءۇشىن ولاردىڭ كەپىلمەن قامتاماسىز ەتىلۋى جەتكىلىكسىز بولعان كەزدە قاجەتتى قارجىلاندىرۋ كولەمىنىڭ قولجەتىمدىلىگىن قامتاماسىز ەتۋ.
زاڭ ءماتىنى باسپا سوزدە جاريالانادى.
مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتىق قورعاۋ، ەلەكتر ەنەرگەتيكاسى جانە مەملەكەتتىك مۇلىكتى باسقارۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويعانىن جازعان ەدىك.
