پرەزيدەنت: بىزگە عالىمدار، ينجەنەرلەر، ونەرتاپقىشتار قاجەت

 الماتى. KAZINFORM - مەملەكەت باسشىسى قاسىم-جومارت توقايەۆ الماتىدا عالىمدارمەن كەزدەستى.

كەزدەسۋ بارىسىندا ماماندارىمىز الەمدىك باسەكەگە توتەپ بەرە الاتىنداي ءبىلىمدى، بىلىكتى بولۋى كەرەك ەكەنىن ايتتى. بۇل تۋرالى اقوردانىڭ باسپا ءسوز قىزمەتى حابارلادى.

قاسىم-جومارت توقايەۆتىڭ ايتۋىنشا، شيكىزاتقا ارقا سۇيەپ وتىرعان ەل الىسقا بارمايدى. بىزگە عالىمدار، ينجەنەرلەر، ونەرتاپقىشتار قاجەت. ماماندارىمىز الەمدىك باسەكەگە توتەپ بەرە الاتىنداي ءبىلىمدى، بىلىكتى بولۋى كەرەك. بۇگىندە الپاۋىت ەلدەردىڭ اراسىندا بارلىق سالادا باقتالاستىق ءورشىپ تۇر. ءبىز وسى كۇردەلى كەزەڭدە ەكونوميكانىڭ جاڭا ۇلگىسىنە كوشە باستادىق. ءادىل، ينكليۋزيۆتى ءارى باسەكەگە قابىلەتتى ەكونوميكا قۇرۋعا كىرىستىك. عىلىم مەن يننوۆاتسيا ونىڭ باستى تىرەگى بولۋعا ءتيىس.

«ءبىز كوشكە ىلەسەتىن ەمەس، كوشتى باستايتىن ەلدەردىڭ قاتارىندا بولۋىمىز كەرەك. ءبىر سوزبەن، عىلىمي الەۋەتىمىزدى ارتتىرۋ قاجەت. جالپى، وسى باعىتتا ءبىراز شارۋا اتقارىلىپ جاتىر. مەن عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا ءبىرقاتار ناقتى تاپسىرما بەردىم. بارلىق ماسەلە مەنىڭ تىكەلەي باقىلاۋىمدا. قازىر «عىلىم جانە تەحنولوگيالىق ساياسات تۋرالى» زاڭ جوباسى پارلامەنتتە قارالىپ جاتىر. كەشە سەنات ونى ءبىرىنشى وقىلىمدا ماقۇلدادى. بۇل - وتە ماڭىزدى ءارى كوپتەن كۇتكەن قۇجات. عىلىمدى باسقارۋ جۇيەسىن جەتىلدىرۋ كەرەك. عالىمدارعا الەۋمەتتىك قولداۋ كورسەتۋ ماسەلەسى دە وتە ماڭىزدى. سوندىقتان زاڭدا عىلىمي قاۋىمداستىقتىڭ مۇددەسى بارىنشا ەسكەرىلەتىن بولادى»، - دەدى پرەزيدەنت.

مەملەكەت باسشىسى قاسىم-جومارت توقايەۆ عالىمدارمەن كەزدەسكەنىن جازعان بولاتىنبىز.