پرەزيدەنت بۋرابايدى دامىتۋ جوسپارى 12 جىلدان بەرى ىسكە اسپاعانىن سىنعا الدى

استانا. KAZINFORM - قاسىم- جومارت توقايەۆ تۋريزمدى دامىتۋ جونىندە كەڭەستە شۋچە- بۋراباي كۋرورتتىق ايماعىنداعى تۇمسا تابيعات، تاريحي جانە مادەني ەسكەرتكىشتەر ءبىزدىڭ بىرەگەي بايلىعىمىز ەكەنىن اتاپ ءوتتى.

Бурабай, Боровое
Фото: Виктор Федюнин/Kazinform

- بۋراباي استانادان الىس ەمەس. سوندىقتان ەلوردا تۇرعىندارى مەن قوناقتارى بۇل جەرگە ءجيى بارادى. تۋريستەر سانى جىلدان جىلعا ارتىپ كەلە جاتىر. دەگەنمەن وندا ينفراقۇرىلىم سالۋ جۇمىسى وتە باياۋ ءجۇرىپ جاتىر. سونىڭ سالدارىنان جەرگىلىكتى دەمالىس ورىندارىنداعى ەكولوگيالىق احۋال ءالى دە كۇردەلى. جەرگىلىكتى بيلىك ماڭىزدى ينفراقۇرىلىمدىق جوبالاردىڭ ورىندالۋىن سوزبالاڭعا سالىپ وتىر. مىسالى، شۋچە- بۋراباي كۋرورتتىق ايماعىن دامىتۋ جوسپارى تولىق جۇزەگە اسقان جوق. بۇل قۇجات سوناۋ 2012 -جىلى قابىلدانعان. جوسپار بويىنشا 126 ميلليارد تەڭگە بولىنۋگە ءتيىس ەدى. ءىس جۇزىندە 35 ميلليارد تەڭگە بەرىلگەن. بۇل - كوزدەلگەن قارجىنىڭ نەبارى 28 پايىزى. ون جىلدان استام ۋاقىت ءوتتى. ءبىراق دەمالىس ورنىندا تازارتۋ قوندىرعىلارى ورناتىلعان جوق. سۋ جەلىلەرى مەن جىلۋ كوزدەرىنىڭ قۇرىلىسى دا تولىق بىتپەگەن. ۇكىمەت، پرەزيدەنت ءىس باسقارماسى جانە وبلىس اكىمدىگى وسى جوبالاردى كوپكە سوزباي، قىسقا مەرزىمدە اياقتاۋعا ءتيىس، - دەدى مەملەكەت باسشىسى.

ۇكىمەت پەن جەرگىلىكتى اكىمدىككە «بۋراباي» كۋرورتىنىڭ اۋماعىندا ورنالاسقان «اقبۋرا»، جوكەي كولى، قاتاركول، تەكەكول جانە باسقا دا جاڭا تۋريستىك ايماقتاردى دامىتۋ، بۋراباي ايماعىنا استانا، قاراعاندى، پاۆلودار، وسكەمەن قالالارىنان جەدەل قاتىنايتىن پويىزداردى ىسكە قوسۋ، پرەزيدەنت ءىس باسقارماسى ازىرلەپ جاتقان «Burabay Travel» ءبىرىڭعاي سيفرلىق پلاتفورماسىندا ماڭايداعى تۋريستىك ايماقتاردى تۇگەل قامتۋ مىندەتتەرى جۇكتەلدى.

مەملەكەت باسشىسى قازاقستان تۋريزمىن ناسيحاتتاۋ ءۇشىن زاماناۋي قۇرالداردى بەلسەندى قولدانۋ قاجەت دەپ سانايدى.

اۆتور

جانات قاپالبايەۆا

سوڭعى جاڭالىقتار