پرەزيدەنت: بارلىق تۇيتكىل بەيبىت جانە ديپلوماتيالىق جولمەن شەشىلۋگە ءتيىس

 مەملەكەت باسشىسى قاسىم-جومارت توقايەۆ فرانسيا پرەزيدەنتى ەممانيۋەل ماكرونمەن اقورداداعى كەزدەسۋىنەن كەيىنگى بىرلەسكەن مالىمدەمەدە الەمدەگى ءتۇرلى ساياسي شيەلەنىستەر مەن ەكونوميكالىق داعدارىستار ەلدى الاڭداتىپ وتىرعانىن اتاپ ءوتتى، دەپ حابارلايدى Kazinform اگەنتتىگى. 

«سونداي-اق، ءبىز ايماقتىق جانە جاھاندىق كۇن تارتىبىندەگى وزەكتى ماسەلەلەر جونىندە پىكىر الماستىق. الەمدەگى ءتۇرلى ساياسي شيەلەنىستەر، ەكونوميكالىق داعدارىستار ەلىمىزدى الاڭداتىپ وتىر. ارينە، بارلىق تۇيتكىل بەيبىت جانە ديپلوماتيالىق جولمەن شەشىلۋگە ءتيىس. قۇرمەتتى جۋرناليستەر، جالپى بۇگىنگى كەلىسسوز ءوزارا سەنىم جانە تۇسىنىستىك جاعدايىندا ءوتتى. وسىنىڭ ناتيجەسىندە قازاقستان مەن فرانسيانىڭ قارىم-قاتىناسى جاڭا دەڭگەيگە كوتەرىلەدى دەپ سەنەمىن. ەڭ باستىسى، قازىرگى ستراتەگيالىق باعىتىمىز - ەكى ەل حالقىنىڭ دا كەڭ قولداۋىنا يە بولعانى ەرەكشە قۋانتادى»، - دەدى قاسىم-جومارت توقايەۆ.

مەملەكەت باسشىسى بيىل ەكى ەل اراسىنداعى ستراتەگيالىق ارىپتەستىك تۋرالى كەلىسىمگە قول قويىلعانىنا 15 جىل تولعانىنا توقتالدى.

«دوستىق پەن ءوزارا قولداۋعا نەگىزدەلگەن وسى ىنتىماقتاستىقتى ودان ءارى نىعايتۋ - ورتاق مىندەتىمىز. بىرگە كۇش جۇمىلدىرىپ، كوزدەگەن ماقساتقا جەتەمىز. مەن وعان كامىل سەنەمىن. ءبىز قۇرمەتتى پرەزيدەنت ەممانيۋەل ماكرونمەن مازمۇندى كەلىسسوز جۇرگىزدىك. ەكى ەل اراسىنداعى ىقپالداستىقتىڭ اياسىن كەڭەيتۋگە مول مۇمكىندىك بار. فرانسيا - قازاقستاننىڭ ەڭ ءىرى ساۋدا سەرىكتەسىنىڭ ءبىرى. بيىلعى 8 اي ىشىندە ساۋدا-ساتتىق كولەمى وتكەن جىلمەن سالىستىرعاندا 21 پايىزعا ءوستى. ياعني، 2,7 ميلليارد دوللارعا جەتتى. سونداي-اق، فرانسيا نەگىزگى شەتەلدىك ينۆەستورلارىمىزدىڭ قاتارىنا كىرەدى. سوڭعى 15 جىلدا فرانسيادان قازاقستانعا 18,7 ميلليارد دوللارعا جۋىق ينۆەستيتسيا تارتىلدى. ەلىمىزدە 170 تەن استام فرانسۋز كومپانياسىنىڭ تابىستى جۇمىس ىستەۋى - سونىڭ ايقىن دالەلى»، - دەدى پرەزيدەنت.

ەسكە سالايىق، فرانسيا پرەزيدەنتى مەملەكەت باسشىسى قاسىم-جومارت توقايەۆتىڭ شاقىرۋىمەن قازاقستانعا كەلدى.

ساپار اياسىندا ەكى ەل باسشىلارى ساۋدا-ەكونوميكالىق، ينۆەستيتسيالىق جانە ەنەرگەتيكالىق ىنتىماقتاستىقتى نىعايتۋ، سونداي-اق حالىقارالىق جانە وڭىرلىك كۇن تارتىبىندەگى ماسەلەلەردى تالقىلايدى دەپ جوسپارلانعان.

ايتا كەتۋ كەرەك، قازاقستان پرەزيدەنتى قاسىم-جومارت توقايەۆتىڭ فرانسياعا بىلتىر جاساعان رەسمي ساپارى اياسىندا 35 قۇجاتقا قول قويىلعان بولاتىن.