پرەزيدەنت ب ۇ ۇ-نىڭ قارۋسىزدانۋ ماسەلەسى جونىندەگى جوعارعى وكىلىن قابىلدادى
استانا. KAZINFORM - قاسىم-جومارت توقايەۆ ب ۇ ۇ باس حاتشىسىنىڭ ورىنباسارى، قارۋسىزدانۋ ماسەلەلەرى جونىندەگى جوعارعى وكىل يزۋمي ناكاميتسۋدى قابىلدادى، دەپ حابارلايدى اقوردانىڭ باسپا ءسوز قىزمەتى.
كەزدەسۋ بارىسىندا ايماقتىق جانە حالىقارالىق قاۋىپسىزدىكتى قامتاماسىز ەتۋ، قارۋسىزدانۋ مەن يادرولىق قارۋدى تاراتپاۋ ىسىندە قازاقستاننىڭ ب ۇ ۇ ينستيتۋتتارىمەن جان- جاقتى ىقپالداستىعىنىڭ پەرسپەكتيۆالارى تالقىلاندى.
مەملەكەت باسشىسى ب ۇ ۇ باس حاتشىسىنىڭ ورىنباسارىنا ءىلتيپات بىلدىرە وتىرىپ، ۇيىم قازىرگى زاماننىڭ وزەكتى پروبلەمالارىن شەشۋدە ايرىقشا رول اتقاراتىنىن جانە ونىڭ ورنىن ەشقانداي قۇرىلىم الماستىرا المايتىنىن اتاپ ءوتتى.
- قازاقستاننىڭ قارۋسىزدانۋ جانە جاپپاي قىرىپ- جوياتىن قارۋلاردى تاراتپاۋ ماسەلەسىنە قاتىستى ۇستانىمى بەرىك. قازىرگى الەمدە بولىپ جاتقان وقيعالار تۇرعىسىنان العاندا، بۇل ماسەلەلەردىڭ وزەكتىلىگى مەن ماڭىزدىلىعى ارتا ءتۇستى. مۇنىڭ الاڭداۋشىلىق تۋعىزاتىنى ءسوزسىز. ەرتەڭ ءبىز حالىقارالىق يادرولىق سىناقتارعا قارسى ءىس- قيمىل كۇنىن اتاپ وتەمىز. بۇل - بۇكىل ادامزات بالاسىنا يادرولىق سىناقتار جۇرگىزۋدىڭ ءارى يادرولىق قارۋدى قولدانۋدىڭ قاۋىپتى ەكەنىن ەسكە سالاتىن وتە ماڭىزدى داتا. ەلىمىز ب ۇ ۇ ينستيتۋتتارىمەن تىعىز بايلانىس ورناتۋعا بەيىل ءارى ۇيىمدى بالاماسى جوق، امبەباپ حالىقارالىق قۇرىلىم رەتىندە قاراستىرادى، - دەدى پرەزيدەنت.
يزۋمي ناكاميتسۋ قازاقستاننىڭ يادرولىق قارۋدى تاراتپاۋ جونىندەگى جاھاندىق ۇدەرىستە كوشباسشىلىعىن جوعارى باعالادى. سونداي-اق، ەلىمىزدىڭ ورتا دەرجاۆا رەتىندەگى ءرولى ارتىپ كەلە جاتقانىن ەرەكشە اتاپ ءوتتى.
كەزدەسۋدە قاسىم-جومارت توقايەۆ پەن يزۋمي ناكاميتسۋ حالىقارالىق كۇن تارتىبىندەگى وزەكتى ماسەلەلەر تۋرالى پىكىر الماستى.
اۆتور
ەربول جانات
