پرەزيدەنت اقتاۋعا تۇركى الەمىنىڭ مادەني استاناسى مارتەبەسىنىڭ بەرىلۋىمەن قۇتتىقتادى
اقتاۋ. KAZINFORM - مەملەكەت باسشىسى قاسىم-جومارت توقايەۆ «اقتاۋ- تۇركى الەمىنىڭ مادەني استاناسى» گالا-كونسەرتىنىڭ اشىلۋ سالتاناتىنا وراي قۇتتىقتاۋ حاتىن جولدادى.
پرەزيدەنتتىڭ اتىنان جولدانعان حاتتى مادەنيەت جانە اقپارات ءمينيسترى ايدا بالايەۆا وقىدى.
- سىزدەردى اقتاۋ قالاسىنىڭ تۇركى الەمىنىڭ 2025 -جىلى مادەني استاناسى اتانۋىمەن قۇتتىكتايمىن. بۇل - قازاقستان ءۇشىن عانا ەمەس، بارشا باۋىرلاس ەلدەر ءۇشىن ايتۋلى وقيعا. شەجىرەلى ماڭعىستاۋ، قازىنالى ءۇستىرت ايماعى تۇتاس تۇركى وركەنيەتىنىڭ اجىراماس بولىگى سانالادى. كيەلى ولكەدە ۇلتىمىزدىڭ، جالپى تۇركى دۇنيەسىنىڭ سان عاسىرلىق رۋحاني مۇراسى ساقتالعان. تاريحى تامىرلاس، ءداستۇرى ساباقتاس حالىقتاردىڭ ىنتىماقتاستىعىن ودان ءارى نىعايتۋ - بارشامىزدىڭ ورتاق مىندەتىمىز. وسى اتاۋلى جىلدا باۋىرلاستىعىمىزدى بەكەمدەي تۇسەتىن باسقوسۋلار ۇيىمداستىرىلىپ، ماڭىزدى شەشىمدەر قابىلدانادى دەپ سەنەمىن. تۇركى مەملەكەتتەرىنىڭ ىقپالداستىعىن ارتتىرۋعا زور ۇلەس قوسىپ جۇرگەن تۇركسوي ۇيىمىنا جانە وسى ءىس- شارانى ۇيىمداستىرۋشىلارعا شىنايى ريزاشىلىعىمدى بىلدىرەمىن. ءتۇبى ءبىر تۇركى جۇرتىنىڭ بىرلىگى نىعايا بەرسىن. بارشاڭىزعا باق- بەرەكە، تولايىم تابىس تىلەيمىن، - دەلىنگەن مەملەكەت باسشىسىنىڭ قۇتتىقتاۋ حاتىندا.
ەسكە سالا كەتەيىك، بۇعان دەيىن اقتاۋداعى اۋقىمدى گالا- كونسەرت باستالعانىن جازعان ەدىك.
