پرەزيدەنت الپينيست انار بوراشەۆانى قابىلدادى
استانا. KAZINFORM - مەملەكەت باسشىسى قاسىم-جومارت توقايەۆ انار بوراشەۆانى الەمدەگى ەڭ بيىك ەۆەرەست شىڭىن قازاق قىزدارىنىڭ اراسىنان ءبىرىنشى بولىپ باعىندىرۋىمەن قۇتتىقتادى.
پرەزيدەنت ونىڭ وسىناۋ ايتۋلى جەتىستىگى جاستاردى سپورتپەن شۇعىلدانۋعا جىگەرلەندىرگەنىن ايتتى. مەملەكەت باسشىسى سپورتتىڭ مۇنداي قيىن ءارى قاۋىپتى تۇرىمەن اينالىسۋ ءۇشىن اسقان ەرىك-جىگەر، توزىمدىلىك، سونداي-اق پسيحولوگيالىق جانە فيزيكالىق دايىندىق كەرەك ەكەنىنە نازار اۋداردى.
انار بوراشەۆا تاۋعا ورمەلەۋمەن 2015 -جىلدان بەرى اينالىسىپ كەلە جاتقانىن، ال الپينيزمنىڭ قىر-سىرىن كاسىبي تۇردە سوڭعى 4 جىل ىشىندە مەڭگەرگەنىن ايتتى. ەۆەرەستكە دەيىن ول كوپتەگەن شىڭدى باعىندىرىپ ۇلگەرگەن. ونىڭ ىشىندە ءالپى تاۋلارىنداعى مونبلان شىڭى مەن افريكاداعى ەڭ بيىك كيليماندجارو تاۋى بار.
اڭگىمەلەسۋ بارىسىندا الپينيست الداعى ۋاقىتتا الەمدەگى ەڭ بيىك جەتى شىڭدى باعىندىرۋدى جوسپارلاپ وتىرعانىن جەتكىزدى. سونداي-اق ول مەملەكەت باسشىسىنا ەۆەرەست شىڭىنا الىپ شىققان قازاقستان تۋىن سىيعا تارتتى.
قاسىم-جومارت توقايەۆ وتاندىق سپورتشىلار ءارتۇرلى حالىقارالىق دودالاردا ەل نامىسىن لايىقتى دەڭگەيدە قورعاپ جۇرگەنىن اتاپ ءوتىپ، انار بوراشيەۆانىڭ الداعى ۋاقىتتا جاڭا بيىكتەردى باعىندىرا بەرۋىنە تىلەكتەستىك ءبىلدىردى.
اۆتور
اسحات رايقۇل
