پرەزيدەنت الماتى وبلىسىنىڭ اكىمىنە جولداردىڭ قۇرىلىسىنا باسا ءمان بەرۋدى تاپسىردى
استانا. KAZINFORM - مەملەكەت باسشىسى الماتى وبلىسىنىڭ اكىمى مارات سۇلتانعازيەۆتى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.
قاسىم-جومارت توقايەۆقا الماتى وبلىسىنىڭ 2025 -جىلدىڭ ءبىرىنشى توقسانىنداعى الەۋمەتتىك-ەكونوميكالىق دامۋى تۋرالى ەسەپ بەرىلدى.
مارات سۇلتانعازيەۆ ەكونوميكانىڭ نەگىزگى سەكتورلارىندا ءوسىم بايقالاتىنىن باياندادى. اتاپ ايتقاندا، ونەركاسىپتىك ءوندىرىس كولەمى 507,9 ميلليارد تەڭگەنى، اۋىل شارۋاشىلىعى ءونىمى 97,4 ميلليارد تەڭگەنى قۇراعان. شاعىن جانە ورتا بيزنەس سۋبەكتىلەرىنىڭ سانى 146,2 مىڭعا جەتىپ، 7,7 پايىزعا ارتقان.
پرەزيدەنتكە جىل باسىنان بەرى 12 جاڭا ونەركاسىپ جوباسىنىڭ ىسكە قوسىلعانى تۋرالى مالىمەت بەرىلدى. ونىڭ ىشىندە «GALANZ bottlers» ءوندىرىس الاڭىنىڭ كەڭەيۋى، «بارتوعاي گ ە س-28» جانە شارىن وزەنىندەگى شاعىن گ ە س كاسكادىنىڭ قۇرىلىستارى سياقتى اۋقىمدى جوبالار بار. جالپى، وڭىردە قۇنى 2,4 تريلليون تەڭگە بولاتىن 122 جوبا جۇزەگە اسىرىلىپ جاتىر. ناتيجەسىندە 36776 جۇمىس ورنى اشىلادى.
مەملەكەت باسشىسىنا قونايەۆ جانە الاتاۋ قالالارىن دامىتۋ بارىسى جونىندە ايتىلدى. جاڭا باس جوسپارعا سايكەس، وبلىس ورتالىعىندا «Smart Qonaev» قالانى باسقارۋدىڭ ءبىرىڭعاي جۇيەسى ەنگىزىلىپ جاتىر. الاتاۋ قالاسىنىڭ باس جوسپارىنا تۇزەتۋلەر جاساۋ جانە كولىك- ينجەنەرلىك ينفراقۇرىلىمدى جوبالاۋ جۇمىستارى باستالدى.
وبلىس اكىمىنىڭ ايتۋىنشا، «جايلى مەكتەپ» ۇلتتىق جوباسى اياسىندا 17 ءبىلىم ورداسىنىڭ قۇرىلىسى قولعا الىنعان. بۇدان بولەك، وڭىردەگى ءۇش اۋىسىمدى وقۋ ماسەلەسىن شەشۋ ءۇشىن مەملەكەت-جەكەمەنشىك ارىپتەستىك نەگىزىندە 19 مەكتەپ سالۋ جوسپارلانعان. 2025-2027 -جىلدارى 91 وقۋ وشاعىندا كۇردەلى جوندەۋ جۇمىستارى جۇرگىزىلەدى.
مەملەكەت باسشىسى قونايەۆ جانە الاتاۋ قالالارىن، جالپى الماتى اگلومەراتسياسىن دامىتۋعا قاتىستى بارلىق بەلگىلەنگەن ماقساتتاردى ساپالى ءارى ۋاقتىلى ورىنداۋدىڭ ماڭىزىن اتاپ ءوتتى. پرەزيدەنت يندۋستريالدى ايماقتار مەن الاتاۋ ا ە ا- نىڭ الەۋەتىن نىعايتۋعا، سونداي- اق كوممۋنالدىق جانە ەلدى مەكەندەردەگى جولداردىڭ قۇرىلىسىنا باسا ءمان بەرۋدى تاپسىردى.
