پرەزيدەنت پاكىستان ق ك قۇرلىق اسكەرلەرىنىڭ باس قولباسشىسى گەنەرال اسيم مۋنيردى قابىلدادى
استانا. KAZINFORM - مەملەكەت باسشىسى پاكىستان قارۋلى كۇشتەرى قۇرلىق اسكەرلەرىنىڭ باس قولباسشىسى گەنەرال اسيم مۋنيردى قابىلدادى، دەپ حابارلايدى اقوردانىڭ باسپا ءسوز قىزمەتى.
كەزدەسۋدە قورعانىس جانە اسكەري ءبىلىم بەرۋ سالاسىنداعى ىنتىماقتاستىق، سونداي-اق ەكى ەل اراسىنداعى بايلانىستاردى دامىتۋ ماسەلەلەرى تالقىلاندى.
پرەزيدەنت قازاقستاننىڭ پاكىستاندى وڭتۇستىك ازياداعى ماڭىزدى سەرىكتەسى رەتىندە قاراستىراتىنىن اتاپ ءوتتى. سونىمەن قاتار ەكىجاقتى قارىم-قاتىناستاردىڭ وڭ قارقىنمەن دامىپ كەلە جاتقانىنا توقتالدى.
قاسىم- جومارت توقايەۆتىڭ ايتۋىنشا، ەكى ەلدىڭ ەكونوميكالىق، سونىڭ ىشىندە ساۋدا، كولىك جانە لوگيستيكا سالالارىنداعى بايلانىستارىن ودان ءارى ىلگەرىلەتۋگە ايتارلىقتاي الەۋەتى بار.
اسيم مۋنير مەملەكەت باسشىسىنا پاكىستاننىڭ پرەمەر-ءمينيسترى شاحباز شاريفتىڭ ىقىلاسىن جەتكىزدى. قۇرلىق اسكەرلەرىنىڭ باس قولباسشىسى قازاقستان مەن پاكىستاننىڭ قورعانىس ۆەدومستۆولارى اراسىنداعى ىقپالداستىقتى جوعارى باعالادى.
اڭگىمەلەسۋ بارىسىندا ەكىجاقتى ىنتىماقتاستىقتى وركەندەتۋگە تىڭ سەرپىن بەرۋدىڭ، ەكونوميكانىڭ ءتۇرلى سەكتورىنداعى ءوزارا مۇددەگە ساي كەلەتىن مۇمكىندىكتەردى تولىق جۇزەگە اسىرۋدىڭ ماڭىزىنا نازار اۋدارىلدى.
