پرەزيدەنت: 2027 -جىلعا قاراي جۇك تاسىمالداۋ كولەمىن جىلىنا 10 ميلليون تونناعا دەيىن جەتكىزۋدى جوسپارلاپ وتىرمىز
الماتى. KAZINFORM - پرەزيدەنت قاسىم-جومارت توقايەۆ الماتىدا عالىمدارمەن كەزدەسۋ بارىسىندا مەديتسينا، فارماتسيەۆتيكا، بيوتەحنولوگيا سالاسىنداعى عالىمدارىمىزدىڭ الەۋەتى، اگرارلىق عىلىمدى دامىتۋ، اگروونەركاسىپ كەشەنىنە زاماناۋي تەحنولوگيالاردى ەنگىزۋ ماسەلەسىنە توقتالدى.
بۇل تۋرالى اقوردانىڭ باسپا ءسوز قىزمەتى ءمالىم ەتتى.
پرەزيدەنت مەديتسينا، فارماتسيەۆتيكا، بيوتەحنولوگيا سالاسىنداعى عالىمدارىمىزدىڭ الەۋەتى وتە جوعارى ەكەنىن اتاپ ءوتتى. ەلىمىزدە سۇرانىسقا يە پرەپاراتتاردىڭ بالاماسىن، ۆاكسينالاردى جانە باسقا دا مەديتسينالىق ونىمدەردى وندىرۋگە قابىلەتتى ءىرى كاسىپورىندار تابىستى جۇمىس ىستەپ جاتىر.
«حالىقتى وتاندىق مەديتسينالىق بۇيىمدارمەن جانە ءدارى-دارمەكپەن قامتاماسىز ەتۋ دەڭگەيىن كەزەڭ-كەزەڭىمەن كوتەرۋ ماڭىزدى. ءبىز وسى سالادا حالىقارالىق دەڭگەيدەگى جەتەكشى كومپانيالارمەن قارىم- قاتىناس ورناتىپ جاتىرمىز. وتاندىق دەنساۋلىق ساقتاۋ سالاسىنىڭ دامۋى حالىقتىڭ ورتاشا ءومىر ءسۇرۋ ۇزاقتىعىنان كورىنەدى. قازاقستاندا بۇل مەجە 75 جاستان استى. ءبىراق وسى كورسەتكىش بويىنشا الەمدەگى جەتەكشى ەلدەردەن ونداعان جىلعا ارتتا قالىپ قويدىق. بۇل -ءبىز ۇمتىلاتىن ماقساتتىڭ ءبىرى»، - دەدى مەملەكەت باسشىسى.
پرەزيدەنت سونىمەن قاتار قازاقستان اگروونەركاسىپ كەشەنىن دامىتۋدا مول الەۋەتكە يە ءارى ايماقتاعى ازىق-تۇلىك قاۋىپسىزدىگىن قامتاماسىز ەتۋگە ەلەۋلى ۇلەس قوسا الاتىنىن ايتتى. ءبىراق، وكىنىشكە قاراي، بۇل -العا قويىلعان مۇرات قانا. ول ءۇشىن كوپ جۇمىس ىستەۋ كەرەك.
«اۋىل شارۋاشىلىعىنداعى بارلىق مۇمكىندىكتى ىسكە اسىرۋ ماقساتىندا ەڭبەك ونىمدىلىگىن ەداۋىر ارتتىرۋ قاجەت. سوندىقتان اگرارلىق عىلىمدى دامىتۋدىڭ، اگروونەركاسىپ كەشەنىنە زاماناۋي تەحنولوگيالاردى ەنگىزۋدىڭ ءمانى زور. عالىمدارىمىز مالدىڭ تۇقىمىن اسىلداندىرۋمەن اينالىسىپ، كليماتىمىزعا بەيىمدەلگەن، مول ءونىم بەرەتىن ءارى قۋاڭشىلىققا ءتوزىمدى وسىمدىك سۇرىپتارىن شىعارىپ جاتىر. بۇل جۇمىستى بارىنشا كۇشەيتۋ قاجەت. ەلىمىزدىڭ وراسان زور كولىك-لوگيستيكالىق الەۋەتىن ءتيىمدى پايدالانۋ كەرەك. ترانسكاسپي حالىقارالىق كولىك باعىتى الەمدىك ساۋدادا مول مۇمكىندىكتەرگە جول اشادى. 2027 -جىلعا قاراي وسى ءدالىز ارقىلى جۇك تاسىمالداۋ كولەمىن جىلىنا 10 ميلليون تونناعا دەيىن جەتكىزۋدى جوسپارلاپ وتىرمىز. ەلىمىزدىڭ ەۋرازياداعى باستى ترانزيت حابى رەتىندەگى ءرولىن نىعايتۋ ءۇشىن اۆتوكولىك، اۋە جانە تەمىرجول تاسىمالىن دامىتقان ءجون»، - دەدى قاسىم-جومارت توقايەۆ.
