پەريزات قايراتتى تەرگەۋ يزولياتورى قىزمەتكەرلەرى ۇرعانى راس پا
استانا. KAZINFORM - استانا قالاسىنىڭ پوليتسيا دەپارتامەنتى پەريزات قايراتتىڭ تەرگەۋ يزولياتورى قىزمەتكەرلەرى تاراپىنان سوققىعا جىعىلدىم دەگەن مالىمدەمەسىنە قاتىستى تۇسىنىك بەردى.
- 9 -ماۋسىم كۇنى تەرگەۋدەگى پەريزات قايرات پروكۋراتۋرا ورگاندارىنا ارىز ءتۇسىرىپ، مەكەمە قىزمەتكەرى كامەرا ەسىگىن كۇشتەپ جاپقان كەزدە ەسىك اراسىنا قىسىلىپ، دەنە جاراقاتىن العانىن مالىمدەگەن. ارىز بويىنشا جينالعان ماتەريالدار استانا قالاسى پوليتسيا دەپارتامەنتىنە جولدانىپ، قازىر سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر، - دەلىنگەن رەسمي حابارلامادا.
تەرگەۋ اياسىندا مەكەمەنىڭ بەينەباقىلاۋ كامەراسىنداعى جازبا زەردەلەنىپ، قىزمەتكەرلەر مەن كۋاگەرلەردەن جاۋاپ الىندى.
- العاشقى تەرگەۋ ارەكەتتەرىنىڭ ناتيجەسى بويىنشا پەريزات قايرات مالىمدەگەندەي، كامەرا ەسىگىن جابۋ كەزىندە مەكەمە قىزمەتكەرلەرىنىڭ وعان دەنە جاراقاتىن كەلتىرگەنى راستالمادى. بۇعان پەريزات قايراتتىڭ ءوز ارىزىندا كورسەتكەن وقيعا ساتىندەگى بەينەباقىلاۋ جازباسى دالەل بولىپ وتىر، - دەيدى پوليتسيادان.
قازىر اتالعان جايتقا قاتىستى قاجەتتى تەرگەۋ ارەكەتتەرى جۇرگىزىلىپ، ءتيىستى ساراپتاما تاعايىندالدى.
بەلگىلى بولعانداي پەريزات قايراتتىڭ سوتى ءىشىنارا جابىق وتەتىن بولدى.
بۇعان دەيىن ەلوردادا پەريزات قايراتتىڭ ىسىنە قاتىستى الدىن الا سوت وتىرىسى وتكەنىن حابارلاعان ەدىك.
ايتا كەتسەك، بيىل 30-ماۋسىمدا پەريزات قايراتتىڭ ءىسى سوتقا جىبەرىلدى.
ەسكە سالايىق، ەرىكتىلەر قوزعالىسىنىڭ بەلسەندىسى جانە قوعامدىق قايىرىمدىلىق قورىنىڭ قۇرىلتايشىسى پەريزات قايراتقا قاتىستى تەرگەۋ جۇرگىزىلىپ جاتقانى 2024 -جىلى14-قاراشادا بەلگىلى بولدى.
سونداي- اق جوعارعى سوت پەريزات قايراتتىڭ سوتىن تىكەلەي ەفيردەن كورسەتۋ ماسەلەسىن قاراستىرۋعا دايىن ەكەنىن حابارلادى.
