پەريزات قايراتتىڭ سوتى ءىشىنارا جابىق وتەدى

استانا. KAZINFORM - ەلوردا سوتى ەرىكتىلەر قوزعالىسىنىڭ بەلسەندىسى جانە قوعامدىق قايىرىمدىلىق قورىنىڭ قۇرىلتايشىسى پەريزات قايراتتىڭ ۇستىنەن قوزعالعان قىلمىستىق ءىس بويىنشا سوت وتىرىسىن وتكىزۋ فورماتىنا قاتىستى شەشىم قابىلدادى.

سوتتىڭ ءىشىنارا جابىق وتەتىنى تۋرالى شەشىممەن استانا قالاسىنىڭ قىلمىستىق ىستەر جونىندەگى اۋدانارالىق سوتىنىڭ سۋدياسى سابىرجان كارىموۆ تانىستىردى.

- 2025-جىلعى 14-شىلدە كۇنى ساعات 10:00 دە باستى سوت تالقىلاۋىن جالپى تارتىپپەن، اشىق سوت وتىرىسى تاعايىندالدى. ايىپتالۋشىلاردان جاۋاپ الۋ كەزىندە، سوت تالقىلاۋى بارىسىندا تۇسىنىكتەمە بەرۋ كەزىندە، سونداي-اق قۇپيا مالىمەتتەر مەن بانك قۇپياسىن قۇرايتىن ماتەريالدار قاراستىرىلعان كەزدە سوت تالقىلاۋىنىڭ جاريالىلىعى شەكتەلەدى. سوت ءىسىن جۇرگىزۋ ءتىلى - ورىس ءتىلى. ايىپتالۋشىعا قاتىستى بۇلتارتپاۋ شاراسى، تەرگەۋ كەزەڭىنە دەيىن قاماۋدا ۇستاۋ سانكسياسى ساقتالادى، - دەدى سابىرجان كارىموۆ.

بۇعان دەيىن ەلوردادا پەريزات قايراتتىڭ ىسىنە قاتىستى الدىن الا سوت وتىرىسى وتكەنىن حابارلاعان ەدىك.

ايتا كەتسەك، بيىل 30-ماۋسىمدا پەريزات قايراتتىڭ ءىسى سوتقا جىبەرىلدى.

ەسكە سالايىق، ەرىكتىلەر قوزعالىسىنىڭ بەلسەندىسى جانە قوعامدىق قايىرىمدىلىق قورىنىڭ قۇرىلتايشىسى پەريزات قايراتقا قاتىستى تەرگەۋ جۇرگىزىلىپ جاتقانى 2024-جىلى 14-قاراشادا بەلگىلى بولدى.

سونداي-اق جوعارعى سوت پەريزات قايراتتىڭ سوتىن تىكەلەي ەفيردەن كورسەتۋ ماسەلەسىن قاراستىرۋعا دايىن ەكەنىن حابارلادى.