پەريزات قايراتقا قاتىستى قىلمىستىق ءىستى تەرگەۋ اياقتالدى

استانا. KAZINFORM - پەريزات قايراتتىڭ ءىسىن تەرگەۋ بارىسىندا كەلتىرىلگەن شىعىن 3,5 ميلليارد تەڭگە سوماسىندا انىقتالدى.

بۇل تۋرالى قارجىلىق مونيتورينگ اگەنتتىگى ءتوراعاسىنىڭ ورىنباسارى جەڭىس ەلەمەسوۆ ايتتى.

- پەريزات قايراتقا قاتىستى قىلمىستىق ءىستى تەرگەۋ اياقتالدى. قازىرگى كەزدە ماتەريالدارمەن تانىستىرۋ پروتسەسى ءجۇرىپ جاتىر. ەستەرىڭىزدە بولسا، قىلمىستىق ءىستى تەرگەۋ بارىسىندا كەلتىرىلگەن شىعىن بويىنشا ءارتۇرلى سوما ايتىلعان ەدى. قازىر 3,5 ميلليارد تەڭگە سوماسىنداعى شىعىن انىقتالدى، - دەدى ج. ەلەمەسوۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ەسكە سالساق، ەرىكتىلەر قوزعالىسىنىڭ بەلسەندىسى جانە قوعامدىق قايىرىمدىلىق قورىنىڭ قۇرىلتايشىسى پەريزات قايراتقا قاتىستى تەرگەۋ جۇرگىزىلىپ جاتقانى 14-قاراشادا بەلگىلى بولدى.

ارتىنشا پەريزات قايرات پاراسپورت فەدەراتسياسىنداعى قىزمەتىنەن الىندى.

سونىمەن قاتار سوت سانكسياسىمەن پەريزات قايراتتىڭ دۇنيە-مۇلكىنە شەكتەۋ قويىلعانى انىقتالدى.

بۇعان دەيىن پەريزات قايرات پالەستينا تۇرعىندارىنا گۋمانيتارلىق كومەك كورسەتۋ ءۇشىن قاراجات جيناۋدى ۇيىمداستىرعانى تۋرالى حابارلاعان ەدىك. بۇل ەپيزود بويىنشا پەريزات قايرات 200 ملن تەڭگەدەن اسا قاراجاتتى جىمقىردى دەپ كۇدىكتەلۋدە.

كەيىننەن پەريزات قايراتتىڭ ءىسى 100 تومنان اسقانى ءمالىم بولدى.

ال ونىڭ «Biz birgemiz Qazaqstan 2030» قوعامدىق بىرلەستىگى تاراتىلعانى ايتىلدى.