پەريزات قايرات پەن اناسىنا قانداي ايىپتار تاعىلدى

استانا. KAZINFORM - ەرىكتىلەر قوزعالىسىنىڭ بەلسەندىسى جانە قوعامدىق قايىرىمدىلىق قورىنىڭ قۇرىلتايشىسى پەريزات قايرات پەن ونىڭ اناسى عايني الاشبايەۆاعا قاتىستى قىلمىستىق ءىس بويىنشا سوتتا پروكۋرورلار الاياقتىق، قىلمىستىق جولمەن الىنعان كىرىستەردى زاڭداستىرۋ جانە ازاماتتاردىڭ سەنىمىن اسىرا پايدالانۋ فاكتىلەرىن قامتيتىن ايىپتاۋ اكتىسىن جاريا ەتتى.

ايىپتاۋمەن پروكۋرورلار (مەملەكەتتىك ايىپتاۋشى) ارمان كەزەكەن مەن ءمادينا ورازالينا تانىستىردى.

تەرگەۋ ماتەريالدارىنا سايكەس، پەريزات قايرات پەن اناسى عايني الاشبايەۆا الدىن الا ءسوز بايلاسۋ ارقىلى توپ بولىپ ارەكەت ەتكەن. ايىپتاۋ نۇسقاسىنا سايكەس، 2021 -جىلدان 2024 -جىلعا دەيىن ولار قايىرىمدىلىق كومەگى سىلتاۋىمەن جەكە جانە زاڭدى تۇلعالاردان قاراجات جيناپ، ونىڭ باسىم بولىگىن ءوز قاجەتتىلىكتەرىنە جۇمساعان.

جالعان قايىرىمدىلىق ۇيىمىن قۇرۋ

پەريزات قايرات استانادا تىركەلگەن «Biz Birgemiz Qazaqstan 2030» قوعامدىق بىرلەستىگىن قۇرۋدى باستاعان. ايىپتاۋ بويىنشا، ول قۇرىلتايشىلاردىڭ قولتاڭبالارىن قولدان جاساپ، بانك شوتتارىن ءوز اتىنا جانە اناسىنىڭ اتىنا اشىپ، الەۋمەتتىك جەلىلەردە بەلسەندى جۇمىس جۇرگىزىپ، قايىرىمدىلىققا اقشا جيناعان. كەيىن بۇل قاراجاتتار قولما-قول اقشاعا اينالدىرىلىپ، جەكە قاجەتىنە، ياعني قىمبات زاتتار ساتىپ الۋعا، ساياحات پەن جىلجىمايتىن مۇلىككە جۇمساعان.

بالالار مەن زارداپ شەككەندەرگە كومەك كورسەتۋ سىلتاۋىمەن قاراجات جيناۋ

ايىپتاۋدا 2021 -جىلى پ. قايرات مۇمكىندىگى شەكتەۋلى بالالارعا ارنالعان وڭالتۋ ورتالىعىن سالۋ ماقساتىندا قايىرىمدىلىق اۋكتسيونىن ۇيىمداستىرعانى ايتىلعان. وسى شارا بارىسىندا 21,6 ميلليون تەڭگە جينالعان، ءبىراق ونىڭ ەلەۋلى بولىگى مەيرامحاناعا، گۇل الۋعا، كيىم-كەشەككە جانە جەكە قاجەتتىلىكتەرگە جۇمسالعان.

2023 -جىلى ول قازاقستانداعى پالەستينا ەلشىلىگىمەن گازا سەكتورىنا گۋمانيتارلىق كومەك جيناۋ تۋرالى كەلىسىم جاساعان. الايدا، ايىپتاۋ اكتىسىندە كورسەتىلگەندەي، جينالعان 566 ميلليون تەڭگەنىڭ تەك 7,4 ميلليونى عانا ماقساتتى تۇردە اۋدارىلعان. قالعان قاراجاتقا Mercedes-Benz EQE كولىگى، Sensata Plaza تۇرعىن ءۇي كەشەنىنەن پاتەر العان جانە باسقا دا جەكە شىعىندار جابىلعان.

2024 -جىلعى سۋ تاسقىنى

2024 -جىلعى ناۋرىزدا قازاقستاندا باستالعان سۋ تاسقىنى كەزىندە ايىپتالۋشىلار، ايىپتاۋ نۇسقاسى بويىنشا، ازاماتتاردىڭ ەموتسيالىق كۇيىن پايدالانىپ، تاعى ءبىر رەت قاراجات جيناۋ ناۋقانىن باستاعان. جالپى 2,86 ميلليارد تەڭگە جينالعان. ايىپتاۋعا سايكەس، بۇل قاراجات برەندتى كيىمدەر، زەرگەرلىك بۇيىمدار، كولىكتەر (ونىڭ ىشىندە Lexus پەن Mercedes-Benz S 450)، پاتەرلەر مەن كوتتەدجدەر ساتىپ الۋعا، جوندەۋ جۇمىستارىنا جانە شەتەلدىك ساپارلارعا جۇمسالعان.

قىلمىستىق جولمەن الىنعان كىرىستەردى زاڭداستىرۋ

پروكۋروردىڭ مالىمەتىنشە، پەريزات قايرات پەن عايني الاشبايەۆا 1 ميلليارد تەڭگەدەن استام قاراجاتتى زاڭدى اينالىمعا ەنگىزىپ، مۇلىكتەردىڭ ءبىر بولىگىن تۋىستارىنىڭ اتىنا راسىمدەگەن. سونىڭ ىشىندە - 23 ميلليون تەڭگەگە ساتىپ الىنعان «Rebel Flowers» گۇل بيزنەسى دە بار. بۇل بيزنەس كەيىن قوسىمشا تابىس كوزىنە اينالعان.

وسىلايشا، ءۇش جىل ىشىندە قايىرىمدىلىق سىلتاۋىمەن 3,4 ميلليارد تەڭگە ۇرلانعان.

ايىپتاۋ اكتىسىنە سايكەس، پەريزات قايرات پەن عايني الاشبايەۆاعا قازاقستان رەسپۋبليكاسى قىلمىستىق كودەكسىنىڭ 190-بابى 4-بولىگى 2-تارماعى (اسا ءىرى كولەمدە، ادامدار توبى بولىپ جاساعان الاياقتىق) جانە 218-بابى 3-بولىگى 3-تارماعى (قىلمىستىق جولمەن الىنعان اقشا قاراجاتىن زاڭداستىرۋ) بويىنشا قىلمىستىق قۇقىق بۇزۋشىلىق جاسادى دەگەن ايىپ تاعىلىپ وتىر.

سوت وتىرىسى جالعاسىپ جاتىر.

ايتا كەتسەك، پەريزات قايرات وزىنە تاعىلعان ايىپتارمەن كەلىسپەي وتىر.

سونداي-اق پەريزات قايرات تەرگەۋ يزولياتورى قىزمەتكەرلەرى ءجابىر كورگەنىن ايتقان ەدى. ارتىنشا ەلوردا پوليتسياسى تەرگەۋ يزولياتورىندا بولعان جايتتىڭ ۆيدەوسىن كورسەتتى.

بەلگىلى بولعانداي پەريزات قايراتتىڭ سوتى ءىشىنارا جابىق وتەدى.

ەسكە سالايىق، ەرىكتىلەر قوزعالىسىنىڭ بەلسەندىسى جانە قوعامدىق قايىرىمدىلىق قورىنىڭ قۇرىلتايشىسى پەريزات قايراتقا قاتىستى تەرگەۋ جۇرگىزىلىپ جاتقانى 2024 -جىلى 14-قاراشادا بەلگىلى بولدى.