پەريزات قايرات اناسىن ورتاعا سالىپ، 23 ميلليون تەڭگەگە گۇل بيزنەسىن ساتىپ العان

استانا. KAZINFORM - استانادا پەريزات قايرات پەن ونىڭ اناسى عايني الاشبايەۆاعا قاتىستى 3,5 ميلليارد تەڭگە كولەمىندە قايىرىمدىلىققا جينالعان قارجىنى جىمقىرۋ دەرەگى بويىنشا ءوتىپ جاتقان سوت پروتسەسى جالعاسىپ جاتىر.

سوت وتىرىسىندا Rebel Flowers گۇل بيزنەسىنىڭ بۇرىنعى يەسى ءلايلا ترويتسكايا جاۋاپ بەردى.

ونىڭ ايتۋىنشا، ءوزىن عايني الاشبايەۆا (پەريزات قايراتتىڭ اناسى) دەپ تانىستىرعان ايەل قوڭىراۋ شالىپ، دۇكەندى ساتىپ الۋدى ۇسىنعان. الايدا ءلايلا ترويتسكايا كەلىسسوز جۇرگىزۋ جانە ەسەپ ايىرىسۋدى تىكەلەي پەريزات قايراتپەن جۇرگىزگەن.

كۋاگەر كەلتىرگەن مالىمدەمەگە سايكەس، پەريزات قايرات گۇل بيزنەسىن 23 ميلليون تەڭگەگە ساتىپ العان، ونىڭ ىشىندە:

- 2 ميلليون تەڭگەنى باسىندا اۋدارعان؛

- 10 ميلليون تەڭگەنى قولما-قول بەرگەن؛

- 11 ميلليون تەڭگەنى ونلاين اۋدارىم ارقىلى تولەگەن.

سونداي-اق Talan Gallery وكىلدەرىمەن دە كەزدەسۋلەر بولعان. ناتيجەسىندە بيزنەس پەريزات قايراتتىڭ اتىنا راسىمدەلگەن.

بۇعان دەيىن «اسار-ۇمە» قورىنىڭ پرەزيدەنتى اسحات نۇرماشيەۆ كۇدىكتى پەريزات قايراتقا 200 ميلليون تەڭگە اۋدارعانىن ايتتى.

سونداي-اق تانىمال بلوگەر ولجاس سادىق سوتتا كۋالىك ەتۋ بارىسىندا پەريزات قايراتقا 83,5 ميلليون تەڭگەگە الدانعانىن ايتتى.

ايتا كەتسەك، ۇكىمەت باسشىسى ولجاس بەكتەنوۆ پەريزات قايراتتىڭ ۇستىنەن قوزعالعان ىسكە قاتىستى پىكىر ءبىلدىردى.