رەيستى ءجيى كەشىكتىرەتىن توپ-3 سەبەپ

استانا حالىقارالىق اۋەجايىنىڭ باسپا ءسوز قىزمەتى ستاتيستيكالىق اقپاراتتى قولدانا وتىرىپ، رەيستەردى كەيىنگە قالدىرعان توپ 3 سەبەپتى انىقتادى، دەپ حابارلايدى Kazinform.

11-15-جەلتوقسان ارالىعىندا استانا حالىقارالىق اۋەجايىنان ىشكى جانە حالىقارالىق باعىتتا 341 رەيس ورىنداۋ جوسپارلانعان.

وسى اپتادا ەلوردادا قولايسىز اۋا رايى ورناپ، تەرمومەتر باعانى - 30 گرادۋس ايازدى (جەلدىڭ اسەرىمەن -44) كورسەتتى.

سالدارىنان جوسپارلانعان رەيستىڭ 152- ءسى ءتۇرلى سەبەپپەن كەشىكتىرىلدى.

ءبىرىنشى سەبەپ: ۇشاقتىڭ استانا حالىقارالىق اۋەجايىنا كەش كەلۋى. وسىنداي سەبەپپەن 5 كۇن ىشىندە 96 رەيس كەشىككەن. ياعني اۋە كومپانيالارىنىڭ ۇشاقتارى استانادان بەلگىلەگەن باعىتقا ۇشپاس بۇرىن، ونان الدىڭعى رەيستەن كەش كەلەدى دە، ۇشاقتى قايتا جاراقتاۋ، تازالاۋ، جانار- جاعارماي قۇيۋعا ءبىراز ۋاقىت جۇمساپ، بەلگىلەنگەن ۋاقىتتا ۇشۋعا ۇلگەرمەي جاتادى.

ەكىنشى سەبەپ: ۇشاقتى قاردان نە مۇزدان تازارتۋ، مۇزعا قارسى سۇيىقتىقپەن وڭدەۋگە ۇزاق ۋاقىت قاجەت بولعاندىقتان 17 رەيستىڭ ۋاقىتى وزگەرگەن. استانا حالىقارالىق اۋەجايىندا مۇزعا قارسى سۇيىقتىقتىڭ 2 ءتۇرى قولدانىلادى.

ءۇشىنشى سەبەپ: جايسىز اۋا رايى. 11-15-جەلتوقسان ارالىعىندا اۋا رايى قولايسىز بولىپ، ەلوردا اۋەجايىنداعى 12 رەيس كەشىككەن.

رەيستىڭ كەيىنگە قالدىرىلۋىنا نە كەشىگۋىنە سەبەپ بولاتىن جاعدايلار ءارتۇرلى. ماسەلەن 5 كۇن ىشىندە 10 رەيس ۇشاقتاعى ءتۇرلى اقاۋعا بايلانىستى كەشىككەن. كوپ جاعدايدا ۇشاق قوزعالتقىشتارى دەر كەزىندە ىسكە قوسىلماي قالعان.

بۇل تىزىمگە رەيسكە بەلگىلەنگەن ۇشاقتىڭ اۋىسۋى، ەكيپاج مۇشەلەرىنىڭ تولىق بولماۋى، جولاۋشىلاردى وتىرعىزۋ كەزىندە قايتا تۇگەندەۋ، ءتىزىمدى ناقتىلاۋ سياقتى وزگە دە سەبەپتەردى قوسۋعا بولادى.

استانا - ۇلان باتوردان كەيىنگى الەمدەگى ەڭ سۋىق استانا. سوندىقتان قولايسىز اۋا رايىندا رەيستەر كەشىگەدى. الايدا بارلىق جولاۋشى «قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياتسيا قىزمەتى تۋرالى» زاڭىنىڭ 86-بابىندا تاسىمالداۋشىنىڭ رەيس بولماعان نەمەسە كىدىرگەن كەزدەگى جولاۋشى الدىنداعى جاۋاپكەرشىلىگى نەگىزىندە وزىنە تيەسىلى قىزمەتتەردى تولىعىمەن الۋعا قۇقىلى.

اۆتور

جانات قاپالبايەۆا