ۇرىقتاندىرۋدى ۇتىمدى جۇرگىزسە ۇتارىمىز مول – ا ش م

Мал базары
Фото: Мақсат Шағырбаев/Kazinform

 استانا. KAZINFORM - ەلىمىزدە ءسۇتتى جانە ءسۇتتى-ەتتى مال شارۋاشىلىعىندا اسىل تۇقىمدى بۇقانىڭ ۇرىعىن ساتىپ الۋعا سۋبسيديا قاراستىرىلعان.

شەتەلدەن ۇشاقپەن مالدى تاسىپ اۋرە بولعىسى كەلمەگەندەر ۇرىقتى ۇتىمدى پايدالانىپ وتىر.

بۇدان بولەك، اسىل تۇقىمدى ورتالىقتاردىڭ، اسىل تۇقىمدى جانۋارلاردىڭ ۇرىعى مەن ەمبريوندارىن وتكىزۋ جونىندەگى ديستريبيۋتەرلىك ورتالىقتاردىڭ جانە ۇرىقتاندىرۋشى-تەحنيكتەردىڭ تاۋار وندىرۋشىلەردىڭ جانە اۋىل شارۋاشىلىعى كووپەراتيۆتەرىندەگى ءىرى قارا مالدىڭ انالىق باسىن قولدان ۇرىقتاندىرۋ بويىنشا كورسەتكەن قىزمەتتەرىنىڭ قۇنىن سۋبسيديالاۋ تەتىكتەرى قاراستىرىلعان.

«قازىرگى ۋاقىتتا اگروقۇرىلىمداردا ءسۇتتى جانە ءسۇتتى-ەتتى باعىتتاعى ءىرى قارا مالدى قولدان ۇرىقتاندىرۋمەن قامتۋ ۇلەسى 60-70 پايىزدى قۇرايدى. ياعني، بۇل ءادىس مال شارۋاشىلىعىندا كەڭىنەن قولدانىلىپ كەلەدى. ەكونوميكالىق تۇرعىدان پايداسى كوپ. بۇگىندە ەلىمىزگە شەت ەلدەردەن جوعارى ءونىمدى اسىل تۇقىمدى بۇقالاردان الىنعان ساپالى ۇرىق اكەلىنۋدە»، - دەدى ق ر اۋىل شارۋاشىلىعى مينيسترلىگىنىڭ باسپا ءسوز قىزمەتى اگەنتتىك تىلشىسىنە بەرگەن جاۋابىندا.

2022 -جىلى ەتتى جانە ءسۇتتى باعىتتاعى ءىرى قارا شارۋاشىلىعىن دامىتۋعا 60 ميلليارد تەڭگە قاراجات بولىنسە، 2023 -جىلى شامامەن 70 ميللياردتان استام قاراجات قاراستىرىلعانىن اتاپ وتكەن ءجون.

سوڭعى جاڭالىقتار