ۇرىمجىدە قازاقستاننىڭ تۋريستىك الەۋەتىن ىلگەرىلەتۋ بويىنشا جينالىس ءوتتى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
ديماش قۇدايبەرگەن ستامبۋلدا باسپا ءسوز ءماسليحاتىن وتكىزدى - TRT
26-اقپان كۇنى قازاقستاننىڭ الەمگە تانىمال جاس ءانشىسى ديماش قۇدايبەرگەن ستامبۋلدا باسپا ءسوز ءماسليحاتىن وتكىزدى.
باسپا ءسوز ءماسليحاتى بارىسىندا ديماشتىڭ جاڭا «When I’ve got you» بەينەبايانىنىڭ تۇساۋى كەسىلدى. ءراسىم اياسىندا ءانشى بەينەباياننىڭ يدەيا اۆتورى ءوزى ەكەنىن ايتتى.
بۇل تۋرالى وسى اپتادا تۇركيا راديو تەلەۆيزيا پورتالى حابارلادى.
«كليپتىڭ رەجيسسەرى، ءارى جەلىلىك پروديۋسەرى جانىبەك عۇسمانوۆتىڭ حابارلاۋىنشا بەينەبايان الماتى قالاسىندا ءتۇسىرىلدى. ونىڭ ايتۋىنشا، بەينەباياندى ءتۇسىرۋ كەزىندە قىتايدان كەلگەن 70 مامان جۇمىس ىستەگەن جانە ءدال سول جەردە ارنايى كوستيۋم تىگىلىپ، ەرەكشە وبرازدار جاسالعان»، - دەپ جازادى تۇركيالىق ب ا ق.
ستامبۋلدا وتكەن باسپا ءسوز ءماسليحاتىندا ديماش تۇركيالىق جانكۇيەرلەرىمەن قازاق، تۇرىك، اعىلشىن جانە ورىس تىلدەرىندە تىلدەستى ءارى جۋرناليستەردىڭ سۇراقتارىنا جاۋاپ بەرگەن. سونداي-اق جيىن بارىسىندا جەكە كونسەرتى تۇركيادا 24-مامىر ءوزىنىڭ 30 جاسقا تولۋىنا وراي «تيۋپراش» ستاديونىندا وتەتىنىن ايتتى. ايتا كەتەيىك، بۇل ستاديوندا اتاقتى مايكل دجەكسون، رياننا، شاكيرا سياقتى انشىلەردىڭ جەكە كونسەرتتەرى دە بولعان.
سونىمەن قاتار وسى اپتادا «TRT» - دا «ستامبۋل اۋەجايى ەۋروپادا ءبىرىنشى ورىندى يەلەدى» دەگەن تاقىرىپتاعى اقپارات جارىق كورگەن.
تۇركيالىق ب ا ق-تىڭ دەرەگىنشە، ستامبۋل اۋەجايى 12-18-اقپان كۇنى ورتاشا ەسەپپەن 1 مىڭ 302 رەيسپەن ەۋروپاداعى ەڭ كوپ قولدانىلعان اۋەجاي اتاندى. بۇل اقپارات العاشىندا ەۋروپالىق اەروناۆيگاتسيا قاۋىپسىزدىگى ۇيىمىنىڭ (ەۆروكونترول) 12-18-اقپان كۇنگى ەۋروپالىق اۆياتسيالىق ەسەبى جاريالانعان.
«TRT»-نىڭ كەلتىرگەن مالىمەتىنە سۇيەنسەك، ستامبۋل اۋەجايى وسى كەزەڭدە كۇنىنە ورتاشا ەسەپپەن 1 مىڭ 302 رەيسپەن ەۋروپا بويىنشا ەڭ تىعىز جۇمىس ىستەيتىن اۋەجايلار اراسىندا ءبىرىنشى ورىندى يەلەدى. ستامبۋل اۋەجايىنان كەيىن كۇنىنە 1 مىڭ 271 رەيسپەن لوندون حيتروۋ جانە 1 مىڭ 265 رەيسپەن امستەردام سحيپحول اۋەجايلارى كەلدى.
ۇرىمجىدە قازاقستاننىڭ تۋريستىك الەۋەتىن ىلگەرىلەتۋ بويىنشا جينالىس ءوتتى - «حالىق گازەتى»
29-اقپان كۇنى شينجاڭنىڭ ءۇرىمجى قالاسىندا قازاقستاننىڭ تۋريستىك الەۋەتىن ىلگەرىلەتۋ جانە B2B رەسۋرستارىن سايكەستەندىرۋ بويىنشا كەزدەسۋ ءوتتى، دەپ حابارلايدى قىتايدىڭ «حالىق گازەتى».
اتالعان ب ا ق-تىڭ مالىمەتىنشە، قازاقستاننىڭ «اتامەكەن» ۇلتتىق كاسىپكەرلەر پالاتاسى ءتورالقاسىنىڭ ءتوراعاسى رايىمبەك باتالوۆ باستاعان 40 تان استام دەلەگاتسيا مۇشەسى شينجاڭعا كەلدى. ولار مۇندا تۋريزمدى دامىتۋ جانە ۇيلەستىرۋ بويىنشا جۇمىس جۇرگىزبەك.
كوز دارىگەرى كۇليزا الدانىش قىزى يندونەزياداعى حالىقارالىق سىيلىقتى جەڭىپ الدى - janadauir.com
35 جىل بويى ۇزدىكسىز كوز دارىگەرى بولىپ جۇمىس ىستەگەن، كەڭەسشى دارىگەر، كلينيكا پروفەسسورى كۇليزا الدانىش قىزى يندونەزيانىڭ بالي قالاسىندا وتكەن 39-ازيا تىنىق مۇحيتى وفتالمولوگيا اكادەمياسىنىڭ كونگرەسىندە APAO-2024 Distinguished service award حالىقارالىق دەڭگەيدەگى سىيلىعىمەن ماراپاتتالدى، دەپ جازادى موڭعوليالىق janadauir.com باسىلىمى.
اتالعان ب ا ق-تىڭ مالىمەتىنشە، بۇل سىيلىقتىڭ ماڭىزى ەرەكشە. الەمدە 8 ميللياردعا جۋىق ادامنىڭ ەڭ كەمىندە 2 ميللياردى كوز اۋرۋىنان زارداپ شەگەدى ەكەن.
«اسىرەسە قازىرگى سمارتفون مەن عالامتوردىڭ وركەندەۋىنە وراي كوز اۋرۋلارىنىڭ كوبەيۋىنە الەمدىك عالىمدار قاتتى الاڭداۋلى. كوز دارىگەرلەرى مەن وسى سالانى زەرتتەيتىن عالىمدار ءار جىل سايىن باس قوسىپ، اتالمىش ماسەلەنى تالقىلايدى»، - دەپ جازادى janadauir.com.
الەمنىڭ كەيبىر وڭىرلەرىندە مەديتسينا سالاسى قولجەتىمسىز بولسا، كەي مەملەكەتتەردە باعاسى اسا قىمبات بولعاندىقتان كوزىن كورسەتە المايتىن ادامدار دا كەزدەسەدى. سوندىقتان دا الەمدىك عالىمدار بۇكىل اۋىل-قىستاققا دەيىن جەتىپ جۇمىس ىستەۋ قاجەتتىگىن ەسكەرتەدى. بايان-ولگەي ايماعىنىڭ دارىگەرى كۇليزاعا كەلسەك، كوپ جىل بويى اتالعان ايماقتاعى حالقىنا قىزمەت كورسەتىپ كەلەدى ەكەن.
ول 2007 -جىلى ءۇندىستانعا بارىپ جاساندى بۇرشاق ورناتۋ وتاسىن جاساۋ كۋرسىنا تابىستى قاتىسقان. سونداي-اق، رەسەيدىڭ گورنو التاي قالاسىنداعى بالالاردىڭ كوز ەمحاناسىندا ءبىلىمىن جەتىلدىرىپ كەلگەن. 2010 -جىلى يركۋتسك فەدەروۆ كوز ينستيتۋتىندا كوزدىڭ قىسىمى اۋرۋىنا بايلانىستى ءبىلىمىن ارتتىرىپ كەلىپ، قاريالاردىڭ كوزىنە بۇرشاق سالۋ وتاسىن جاساعان. ول قازىرگە دەيىن جۇزدەگەن قارتقا كوز جانارىن سىيلاعان التىن قولدى دارىگەر.
قاز ۇ ۋ-دا پارسىشا- قازاقشا فرازەولوگيالىق سوزدىكتىڭ تۇساۋكەسەرى ءوتتى - Parstoday
27-اقپان كۇنى ءال-فارابي اتىنداعى قازاق ۇلتتىق ۋنيۆەرسيتەتى شىعىس تانۋ فاكۋلتەتىنىڭ تاياۋ شىعىس جانە وڭتۇستىك ازيا كافەدراسى وسى ۋنيۆەرسيتەتتىڭ 90 جىلدىعى اياسىندا جارىق كورگەن پارسىشا- قازاقشا فرازەولوگيالىق سوزدىكتىڭ تۇساۋكەسەرىن وتكىزدى.
بۇل تۋرالى وسى اپتادا يراننىڭ «Parstoday» اقپارات اگەنتتىگى دە حابارلادى.
يراندىق باسىلىمنىڭ مالىمەتىنشە، تۇڭعىش رەت جارىق كورىپ وتىرعان پارسىشا- قازاقشا فرازەولوگيالىق سوزدىككە پارسى تىلىندە ءجيى قولدانىلاتىن ماقال- ماتەلدەر، قاناتتى سوزدەر، سىپايىلىق فورمۋلاسىنا جاتاتىن ءسوز تىركەستەرى مەن اۋىزەكى تىلدە ءجيى قولدانىلاتىن العىس، قارعىس، قولپاشتاۋ، تاڭدانۋ جانە ت. ب. قاتىستى تۇراقتى ءسوز تىركەستەرى ەنگەن.
پارسىشا- قازاقشا فرازەولوگيالىق سوزدىك پارسى جانە قازاق تىلدەرىندە بىردەي سويلەيتىن وقىرماندارعا، سونداي-اق پارسى ءتىلىن ۇيرەنۋشىلەرگە جانە فرازەولوگيزمدەردى زەرتتەۋشى ماماندار مەن وسى تاقىرىپقا قىزىعاتىن بارشا وقىرمان قاۋىمىنا ارنالادى. بۇل سوزدىك پارسى ءتىلىن ۇيرەنۋشىلەر مەن يرانتانۋ سالاسى بويىنشا جۇمىس ىستەيتىن ماماندارعا اسا قاجەتتى كومەكشى وقۋ قۇرالى بولىپ تابىلادى. سوزدىكتى قۇراستىرعاندار - تاياۋ شىعىس جانە وڭتۇستىك ازيا كافەدراسى يرانتانۋ ءبولىمىنىڭ ۇستازدارى ا. ج. بورانبايەۆا، ع. ت. جۇماديلوۆا جانە ع. ءا. قامباربەكوۆا.
وزبەكستان- قازاقستان: ءبىلىم سالاسىنداعى ىنتىماقتاستىق نىعايادى - «ءوز ا»
وزبەكستان مەن قازاقستان جوعارى ءبىلىم جانە عىلىم سالالارىنداعى ىنتىماقتاستىقتىڭ جاڭا قادامىنا دايىندالىپ جاتىر. ءور جوعارى ءبىلىم، عىلىم جانە يننوۆاتسيا ءمينيسترى شاريپوۆ قۋنعيراتباي پەن قازاقستاننىڭ وزبەكستانداعى ەلشىسى بەيبىت اتامقۇلوۆتىڭ كەزدەسۋىندە وسى جاعدايلار تالقىلاندى.
بۇل تۋرالى وزبەكستاندىق «ءوز ا» اقپاراتتىق اگەنتتىگى حابارلادى. قازاقستان ەلشىلىگىنىڭ مالىمەتىنشە، قازىرگى تاڭدا ەكى ەلدىڭ جوعارى وقۋ ورىندارى اراسىندا تىكەلەي جاسالعان 471 كەلىسىمشارت بار.
وزبەكستاندىق ب ا ق-تىڭ دەرەگىنشە، 2023 -جىلدىڭ جەلتوقسان ايىنداعى مالىمەت بويىنشا، قازاقستاننىڭ وقۋ ورىندارىندا وزبەكستاننىڭ 6721 ازاماتى، وزبەكستاننىڭ جوعارى ءبىلىم بەرۋ جۇيەسىندە قازاقستاننىڭ 416 ازاماتى ءبىلىم الۋدا.
سونىمەن قاتار، مەملەكەت باسشىلارىنىڭ تاپسىرماسى مەن ۇكىمەتارالىق كەلىسىم نەگىزىندە تاشكەنت وبلىسىنىڭ شىرشىق قالاسىندا م. اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ فيليالىن جانە الماتىدا تاشكەنت يرريگاتسيا جانە اۋىل شارۋاشىلىعىن مەحانيزاتسيالاۋ ينجەنەرلەرى ينستيتۋتىن اشۋ جوسپارلانعان.
كەزدەسۋدە وزبەكستان مەن قازاقستان باسشىلىعىنىڭ ەل دامۋىندا عىلىم مەن بىلىمگە باسىمدىق بەرىپ وتىرعانى ءسوز بولدى.
قازاقستان ستۋدەنتتەرى «تۇركيا ءۇنى» راديوسىنا سۇحبات بەردى - TRT
تۇركيا راديو تەليەۆيزيا پورتالىندا وسى اپتادا «تۇركيا ءۇنى» راديوسىنىڭ ەفيرىندە قوجا احمەت ياساۋي اتىنداعى حالىقارالىق قازاق- تۇرىك ۋنيۆەرسيتەتى الەۋمەتتىك-گۋمانيتارلىق عىلىمدار فاكۋلتەتى جۋرناليستيكا ماماندىعىنىڭ 4-كۋرس ستۋدەنتتەرى ەرباقىت نىعمەت، اياۋلىم ءابدىراحمان جانە نازىم ماليك قىزى قاتارلى بولاشاق جۋرناليستەردەن العان سۇحباتتارى جاريالانعان.
راديو ەفيرىندەگى جۇرگىزۋشى تورعىن سۇلتان قىزى ستۋدەنتتەرگە قويعان ءارتۇرلى سۇراقتارىنا جاۋاپ العان.
قىتايلىق قانداسىمىز سامعار سەرىك ۇلى شاڭعى جارىسىنان باس جۇلدەنى جەڭىپ الدى - CNR
قىتايدىڭ ىشكى موڭعول اۆتونوميا ولكەسى ۋلانچاب قالاسىندا وتكەن 14-كەزەكتى مەملەكەتتىك قىسقى سپورت تۇرلەرىنىڭ دالالىق قار شاڭعى جارىسىندا سامعار سەرىك ۇلى اتتى قانداسىمىز جەڭىس تۇعىرىنان كورىندى، دەپ حابارلايدى قىتايدىڭ ورتالىق حالىق راديوسى.
اتالعان ب ا ق-تىڭ حابارلاۋىنشا، سپورتتىق بايگەدە جاستار توبىنداعى ەرلەردىڭ قىسقا ارالىققا سىرعاناۋ جارىسىندا شينجاڭ كومانداسىنىڭ مۇشەسى سامعار سەرىك ۇلى باس جۇلدەنى جەڭىپ الىپ، التىن مەدال ەنشىلەگەن.
اۆتور
بەيسەن سۇلتان
